“Non se acaba nin cando, nin como me gustaría, pero acábase onde eu quería”. Así anunciaba Anaïr Lomba a súa retirada do fútbol por mor da súa lesión de xeonllo.
Entre bágoas por ter que marchar “cunha ferida aberta que me robou horas de soño”, a galega xogadora do RCD Espanyol desde hai oito anos despediuse dos campos arroupada polo seu club.
Anaïr Lomba tería que terse retirado no verde, loitando polo ascenso “que desde hai medio ano é algo que me obsesiona” xunto ás súas compañeiras. Pero non puido ser. A saúde anteponse á súa carreira, e o seu xeonllo “gañou a batalla”.
“Cheguei a acostumarme a almorzar pastillas e a vivir coa dor, aínda que ultimamente non podía camiñar despois dos partidos”, confesou na rolda de prensa ante os medios.
Lo mejor de Barcelona… 💙 pic.twitter.com/67TZWYrVa0
— Anaïr Lomba (@Anair16) January 24, 2022
Tal e como recordan desde a Real Federación Galega de Fútbol, Lombi (A Guarda, 1989) comezou xogando no equipo do seu pobo na UD Guía. Despois, tivo un verán no que xogou uns partidos na Unión Guardesa. Ese mesmo verán fichou polo FC Barcelona e logo fun ao Oliveira. Posteriormente, comezou a súa etapa no RCD Espanyol e por último, no Valencia.
A deportista anunciara que colgaba as botas no ano 2019, pero ao seguinte regresou á disciplina do Espanyol, o club da súa vida. Porque precisamente achacaba ese adeus a que sentía que enganaba a outro equipo se trataba de defender a súa camiseta. A tempada pasada sufriu o descenso co conxunto perico e agora márchase sen poder conseguir o regreso á elite e encomendando ás súas compañeiras que o consigan.
Con 32 anos, Anaïr Lomba disputou 113 partidos coas branquiazuis, e agora di adeus pasando a ser unha afeccionada máis: “Grazas pericos, agora serei unha máis con vós desde a bancada. O mellor de Barcelona é e será ser do Enspanyol”.