A adestradora do Guardés, Ana Seabra, tamén estivo presente en San Sebastián este mediodía. Diante o resultado do sorteo, indicou que “si, claro” que hai ganas de desquite, pero apuntando que “o Replasa Beti-Onak é un equipo que nos custa sempre moito polo seu persoal e pola súa calidade, e o que fixo tanto na última tempada, como nesta aínda máis, demostra que está a crecer de verdade”.
A técnica puxo en valor a dureza do seu rival de cuartos, o Replasa Beti-Onak, insistindo en que as súas teñen “moito respecto” pero lembrando que tamén “temos unha espinita aí” do ano pasado, e para quitala “queremos competir, facer o noso e estar ben, poque vai ser un partido distinto”. En calquera caso, Seabra deixou claro que equipo miñoto fará todo o posible por cumprir con “a ilusión de seguir adiante”.
Ana Seabra: “O partido definirase en detalles”
Con respecto ás claves para este duelo contra do Beti-Onak, a preparadora miñota remitiu á cita entre ambos a pasada edición. Para Ana Seabra, será necesaria “moita concentración”, xa que o partido “definirase en detalles” tal e como sucedeu o ano pasado.
“A efectividade custounos moito en todos os partidos que xogamos contra elas, e na última Copa foi o que nos custou o pase a semifinais”, explicou a adestradora, para a que o Beti-Onak, pola súa banda, estivo “incrible” no ultimo torneo copeiro, destacando pola súa regularidade.
En definitiva, o obxectivo seguirá sendo volver pelexar e competir para levar este primeiro partido, que en palabras da técnica Ana Seabra, “define o resto” e é o primeiro no que hai que pensar e preparar.
O Guardés repetirá contra o Beti-Onak en cuartos de final da Copa da Raíña 2026
