Ana Cernadas do C. Fluvial de Lugo é a nova campioa da Copa Galega Sénior disputada na piscina Rosario Dueñas de Ourense, nun campionato que premia as mellores marcas por puntuación FINA.
Cernadas foi primeira con 703 puntos pola proba de 200 costas, seguida por Antía García do C. N. Galaico que foi segunda con 698 puntos pola proba de 50 libre e o terceiro posto foi para Alba Gómez do C. N. Arteixo con 696 puntos en 200 libre.
Nadadoras de récord
A nadadora do club lucense corouse campioa quedando primeira, cunhas espectaculares marcas. Ana Cernadas estableceu un novo récord galego nos 100 e 200 metros costas, rematando a primeira proba en 1:07.53 e a segunda en 2:18.67.
Pola súa banda, Rosalía Marín, do CN Coruña, tamén estableceu unha mellor marca galega na distancia dos 50 metros costas, cun tempo de 30.74.
Consulta aquí todos os resultados.
O Ponteareas lévase o campionato júnior e o Portamiñá o infantil
Na outra competición que acolleron as instalacións ourensás, o CN Ponteareas foi o vencedor no Campionato Júnior, sumando 407 puntos na táboa feminina. Na mixta, o campión foi o AD Fogar, ao sumar os subcampionatos feminino e masculino. As júniors do Fogar sumaron 16 medallas, tres delas ouro, oito de prata e cinco de bronce, destacando as actuacións de Nana Suárez, Carla Jiménez e os equipos do 4×100 e 4×200.
Pola súa banda, o CN Portamiñá resultou vencedor na competición infantil feminina, co CN Ferrol como primeiro clasificado mixto.
