A Secretaría Xeral da Real Federación Galega de Fútbol (RFGD) informou da ampliación do prazo para formalizar a inscrición de licenzas federativas en categorías autonómicas. O período rematara inicialmente o 30 de abril e queda ampliado tras o comunicado da institución ata ás 22:00 horas de mañá, 7 de maio de 2021.
O motivo desta decisión é o elevado número de licenzas pendentes de tramitación nas competicións e que non poden ser dilixenciadas dentro do tempo inicialmente establecido. A RFGF apunta a razóns “técnicas e federativas”, alleas aos clubs, como causas da demora.
A incerteza xeral provocada pola COVID-19 fixo xurdir varias dúbidas sobre o futuro desta licenzas, relativas a se poderían cancelarse ou se as xogadoras poderían fichar por outro club se o seu non compite. A comezos deste ano, a Federación Galega de Fútbol explicou a súa postura sobre o manexo dos documentos acreditativos en período de pandemia.
Competicións afectadas pola prórroga na inscrición de licenzas
A prórroga, que pretende subsanar esta eventualidade, afecta a un total de 23 competicións. Entre as ligas atópanse a Liga Galega Promesas Feminina e a Galega Xuvenil, esta última nunha cota de idade que abrangue tamén a Primeira e a Segunda Autonómica Xuvenil.
Na modalidade cadete, a ampliación acada á División de Honor Cadete, Primeira e Segunda Autonómica Cadete e a Liga Galega Cadete. A derradeira está ademais afectada na súa categoría máis nova, a Liga Galega Infantil, xunto coa Primeira e Segunda Autonómica Infantil.
Dentro dos alevíns, poderán formalizar inscricións ata mañá os interesados na Primeira Alevín F-11, e a Primeira, Segunda e Terceira Alevín F-8. Do mesmo xeito, os clubs poderán optar á 1ª e 2ª División Liga Galega Feminina; e a Primeira, Segunda e Terceira Benjamín F-8 e Primeira, Segunda e Terceira Prebenjamín F-8.
