- A internacional española Amelia Portero chega a Lugo tras pasar por clubs como Logroño, Haro, Menorca ou Kiele, e gañar todos os títulos nacionais.
- A súa figura servirá como referente para as xogadoras máis novas do club, por experiencia, calidade e traxectoria.
- “É unha xogadora con experiencia contrastada, que será un espello para as canteirás e unha peza crave para construír un equipo gañador”, sinala o director de vóley, Andrés Hurtado.
O CV Arenal Emevé incorpora ao seu primeiro equipo a Amelia Portero Losilla, unha das xogadoras máis determinantes da liga Iberdrola na última década. Internacional coa selección española, cunha traxectoria impecable e un palmarés repleto de títulos, Amelia Portero reforza o proxecto lucense tras militar en clubs como Haro Rioxa, Kiele Socuéllamos, Avarca de Menorca e o histórico Logroño.
Nada en Almería en 1995, Amelia foi unha habitual nas fases finais da liga Iberdrola, a Copa da Raíña e diversas competicións europeas. No seu palmarés figuran varios títulos de Liga, Copa e Supercopa, así como participacións con España na European Golden League e en clasificatorios europeos e intercontinentais.
Desde o club valórase especialmente a súa experiencia, a súa calidade técnica e a súa fiabilidade en tarefas defensivas e de recepción. “É unha xogadora cunha calidade técnica exquisita, moi habilidosa no primeiro toque e con capacidade para sumar en ataque con moitos recursos”, explica Andrés Hurtado, director de vóley do CV Arenal Emevé. “Dentro da súa traxectoria xogou en moitos equipos, conseguiu ligas e está contrastada dabondo na competición. Cremos que vai achegar moito ao equipo e que nos pode dar moitas alegrías”.
Ademais, desde a dirección deportiva destácase o valor engadido que Amelia Portero pode achegar ao grupo. “A súa chegada permítenos incorporar a unha xogadora con moito percorrido, que pode servir como referente para as canteirás. Encaixa no perfil de xogadora que buscamos: sólida, traballadora, con capacidade de liderado e afeita render en equipos con presión competitiva”, sinala Andrés Hurtado. “É unha incorporación que fortalece ao equipo tanto dentro como fóra da pista”.
Traxectoria de Amelia Portero
Na última tempada, Amelia Portero foi unha das pezas craves do CV Kiele Socuéllamos, cun papel destacado tanto en Liga como na Copa da Raíña e a WEVZA Cup. Anteriormente, viviu a súa etapa máis laureada en Logroño, co que conquistou todos os títulos nacionais, e pasou tamén por Avarca de Menorca, Haro Rioxa e CAEP Soria, acumulando máis dunha década de experiencia na elite.
Coa súa fichaxe, desde o CV Arenal Emevé din que o equipo suma talento e liderado ao novo proxecto deportivo, co obxectivo de consolidar a súa posición na máxima categoría do voleibol español e seguir crecendo con ambición e personalidade.
