O conxunto herculino do Viaxes Amarelle FSF recibe ao ENCE Marín Futsal hoxe mércores para disputar un posto na final da XVI Copa Galicia Feminina de Fútbol sala.
Coruñesas e pontevedresas enfróntanse en semifinais da Copa Galicia nun duelo a partido único. Esta é a segunda ocasión que as herculinas chegan a unha semifinal desta competición do ko. As herculinas mediranse no serán deste mércores 22 de febreiro de 2023, a partir das 21:00 horas, no Pavillón Municipal de Sagrada Familia (A Coruña) ás de Marín.
O conxunto herculino afronta unha semana atípica con tres encontros en apenas sete días. Tras o intenso partido que disputaron o pasado sábado contra o Poio Pescamar FSF, onde conseguiron sacar un punto da casa do segundo clasificado, agora afrontarán un partido para pelar por un posto na final da Copa Galicia.
O técnico do Viaxes Amarelle FSF, Jorge Basanta, convocou, para este duelo de competición copeira, ás porteiras Leti Rojo e Nerea Ramallo, así como ás xogadoras de pista, Cris Lourés, Carol Agulla, Clàudia Lobo, Èlia Gullí, María Gómez, Lau Doce, Tety, Marta Hermo, Laura Rivas e Estela Canteiro.
O rival que estará enfronte para o conxunto herculino é o ENCE Marín Futsal que actualmente ocupa a décima posición da xeral na Primera Federación FutsalFem da RFEF, con 21 puntos, coleitados tras seis vitorias, tres empates e dez derrotas, nos dezanove encontros que disputaron ata a data. Suman 47 goles a favor, e encaixaron 60 tantos en contra.
O ENCE Marín Futsal chegan a estas semifinais da Copa Galiciia, despois de derrotar en cuartos de final ao FSF Castro por un axustado marcador de 2-3.
Na presente tempada ambos os dous equipos enfrontáronse no encontro de competición regular de liga da primeira volta. Dalquela o Viaxes Amarelle acadara unha axustada vitoria por un marcador de 0-2 en casa do equipo de Marín.
Tanto o conxunto coruñés como o pontevedrés tratarán de buscar un posto na final de Copa Galicia Feminina FS. Nin unhas, nin outras poñerán ás rivais as cousas doadas.
No Pavillón da Sagrada Familia haberá entrada libre ata completar o espazo na bancada.
