O Amarelle regresa á Sagrada Familia goleando ao Rodiles FSF (5-0)

O conxunto herculino do Viaxes Amarelle FSF volvía esta fin de semana logo dun mes sen xogar nesa pista á súa casa, o pavillón da Sagrada Familia, e facíao sumando unha nova vitoria tras superar ao Spring Cider Rodiles FSF (5-0). As futbolistas que adestra Jorge Basanta son líderes indiscutibles da Segunda División do Fútbol Sala Feminino da RFEF. Avanzan con paso firme polo camiño que pode levalas de volta á elite do futsalfem estatal.

As herculinas mostráronse con moita intensidade e presión durante todo o partido, e nun gran partido da porteira visitante. O conxunto herculino conseguía levar os tres puntos tras impoñerse por un marcador de 5-0, grazas aos goles de Candela Soria, Patri Romaní, Èlia Gullí e Cris Lourés.

O partido empezaba cun Viaxes Amarelle FSF moi agresivo na presión e buscando a portería contraria desde o segundo cero de partido. Empezaron a chegar as ocasións moi pronto, e empezou a destacar a meta visitante para desbaratar as ocasións locais; pero aos tres minutos de xogo, Cris Lourés executa un saque de banda a Candela Soria, que viraba e conseguía subir o 1-0 ao marcador.

O conxunto visitante afánase en labores defensivos e tentar sorprender á contra, mentres que o Viaxes Amarelle FSF segue buscando ampliar distancias. As galegas xeraban moito perigo, volvendo relucir o traballo da porteira do Rodiles FSF. A falta de algo máis de oito minutos para o tempo de asueto, unha xogada por banda de Carlita, que buscaba o pase ao segundo pau, tenta rexeitalo a defensa asturiana, que termina anotando o gol en propia porta; e poñendo o 2-0 no marcador.

Aínda quedaba moito partido por diante e os ánimos das locais seguían tentando aumentar a renda, e xerando moito perigo, pero saía unha e outra vez a figura da porteira local, que brillaba na portería asturiana e conseguindo manter o 2-0 ao termo do primeiro tempo.

Logo do paso por vestiarios, o Viaxes Amarelle FSF saltaba coa venda no marcador e a mesma ilusión do inicio do partido, polo que buscaba unha e outra vez chegar á portería contraria e tentar facer gol pronto; aínda que este facíase de rogar, ata que aos sete minutos de xogo chega unha gran acción de xogo ofensivo do conxunto herculino que finaliza Patri Romaní ao segundo pau, a pase de Èlia Gullí, nun partido que participou todo o equipo laranxa.

As asturianas empezaron a tentar sorprender co xogo de cinco, pero sen conseguir finalizar ningunha acción, volveron a replegar e optar por unha defensa en media cancha, alternando por momentos unha presión máis alta, aínda que sen conseguir xerar o perigo suficiente para recortar distancias.

As herculinas conseguían subir o 4-0 ao marcador cando restaban pouco máis de tres minutos para o final, nunha xogada de córner que saca Cris Lourés, para Lau Doce, e esta coloca o balón ao segundo pau onde entra con sutileza Èlia Gullí para poñer o cuarto gol da tarde.

Foi a falta de algo máis dun minuto e medio para o final cando chegou unha nova xogada de estratexia de saque de banda do Viaxes Amarelle, que finaliza Cris Lourés cun potente disparo desde a frontal da área para poñer o 5-0, que ao cabo sería definitivo para sumar un novo +3 no casilleiro do Viaxes Amarelle FSF.

O Bembrive FSF será o seguinte rival do Viaxes Amarelle 

Tras este novo partido oficial da tempada, o equipo do Viaxes Amarelle FSF regresará o luns aos adestramentos, para preparar o seguinte duelo, contra un rival directo, da próxima fin de semana.

O encontro correspondente á vixésimo primeira xornada da Segunda RFEF Futsal Feminina, terá lugar o sábado 9 de abril de 2022 no Pavillón Municipal Vicente Álvarez (Vigo) ás 19:30 horas, visitando ao Bembrive FSF.  As viguesas, terceiras, gañaban esta xornada 2-3 ao U.D.C. Txantrea K.K.E.