Coruñesas e ferrolás conseguiron a vitoria nos seus respectivos duelos. Con estos tres puntos, o Viaxes Amarelle, continúa no máis alto da táboa, mentres o Castro FSF queda na zona tranquila da clasificación, e o Valdetires mantense no posto de bronce da Segunda División.
Viaxes Amarelle non da oportunidades ao Castro no derbi galego
Clara vitoria das laranxas no duelo galego da xornada da categoría de prata do futsal. As herculinas dominaron de principio a fin e non deron oportunidades ao Castro para meterse no encontro. 7-1 para as dirixidas por Jorge Basanta na volta ao campionato doméstico.
A pesar das baixas, as coruñesas impuxeron pronto o seu ritmo e non deu opción ao seu rival, conseguindo finalmente a primeira vitoria do ano 2020 sobre o FSF Castro, grazas aos goles de Patri Corral (2), Patri Romaní (2), Yaiza (2) e Irune Santesteban.
O encontro decantouse moi cedo para as laranxas
O duelo empezaba cun Viaxes Amarelle FSF tentando mandar sobre a cancha e impoñerse sobre o rival e xa antes de chegar ao segundo minuto de xogo, Patri Corral cun potente disparo á saída dun córner poñía o 1-0 no marcador cun balón axustado ao pau da meta visitante. As laranxas mandaban sobre a cancha e non paraban de xerar ocasións sobre a portería visitante.
Así chegaba o 2-0 tras unha bonita xogada combinada, con varias paredes entre Patri Corral e Patri Romaní, onde a última anotaba a pracer o 2-0, a porta baleira. Case sen tempo a repoñerse, as visitantes atopábanse co 3-0, tras unha recuperación herculina, e onde Patri Corral cedeu o esférico a Patri Romaní, para que esta última anote a pracer o terceiro da tarde. Apenas transcorreran cinco minutos de xogo, e o partido xa estaba moi de fronte para as herculinas.
O FSF Castro non conseguía xerar o suficiente perigo para recortar distancias. O cadro local non baixaba o ritmo, e seguía xerando ocasións, algunhas delas moi claras que se irían por fóra por moi pouco. Finalmente, a falta de 6 minutos para o tempo de asueto, María Gómez recibiu o balón de costas á portería, e tras tocar o balón ao seu par, Yaiza cun potente disparo de sete metros conseguíu poñer o 4-0 no marcador.
O partido estaba moi cómodo para o Viaxes Amarelle FSF, e a escasos segundos para o final do partido chegaría o 5-0 co que ambos os equipos retiraríanse ao tempo de asueto. Na continuación, as herculinas seguían tendo o balón, mentres que as de Castro de Rei non se afanaba en presionar ás locais, e centrábase en tarefas defensivas para tentar sorprender á contra.
A defensa visitante provocou algunhas dificultades para as locais, que non conseguían facer o seguinte gol ata que a falta de seis minutos para o final do tempo regulamentario chegaba un vertixinoso ataque herculino que finalizaba Patri Corral, a pase de María Gómez. 6-0 no marcador. Aínda quedaba partido por diante, pero o marcador estaba moi de fronte para o equipo local, e cando todo parecía que se ía a terminar co 6-0, Pasto anotaba cun potente disparo á escuadra da portería de Sandra o 6-1.
Aínda quedaban 50 segundos por diante, e as herculinas reaccionaron devolvendo o gol, e subindo ao marcador o 7-1 nun rápido ataque, que finalizaba Yaiza a falta de 30 segundos para o final do partido; sen quedar xa máis opcións para ningún dos dous equipos.
O Complexo Deportivo de Elviña I da Coruña vibrou co seu equipo. O cruce disputado esta tarde deixa ao Amarelle líder e ao Castro na zona tranquila da táboa. As lucences, a pesar de esta contundente derrota, está a facer unha gran tempada no seu debut na categoría.
FICHA TÉCNICA
VIAXES AMARELLE: Sandra, Patri Romaní, Irune Santesteban, María Gómez, Patri Corral (cinco inicial), Yaiza, Inés Suárez, Zaida, Mónica.
FSF CASTRO: Area, Sainza, Lara, Ana, Verónica (cinco inicial), Pasto, Paula, Uxía.
GOLES: 1-0 Patri Corral ( min. 2); 2-0 Patri Romaní ( min. 4); 3-0 Patri Romaní ( min. 5); 4-0 Yaiza ( min. 14); 5-0 Irune Santesteban ( min. 19); 6-0 Patri Corral ( min. 34); 6-1 Pasto ( min. 39); 7-1 Yaiza ( min. 39).
TARXETAS: Patri Corral do Viaxes Amarelle FSF (Tarxeta Amarela).
COLEXIADAS: Castro Nantes e Roldán Pérez do Colexio de Árbitros de Pontevedra. Mesa: Garrido Brandón do Colexio de Árbitros da Coruña.
INCIDENCIAS: Partido correspondente á duodécima xornada do Grupo 1 da Segunda División Nacional Feminina FS disputado o sábado 11 de xaneiro de 2020 no Pavillón do Complexo Deportivo de Elviña I (A Coruña) entre o Viaxes Amarelle FSF e o FSF Castro.
O Valdetires remonta na segunda parte na casa do Valladolid
O Valdetires tamén foi quen de sacar os tres puntos. Neste caso a domicilio contra o Valladolid. As pupilas de Diego Pardo voltaron cara Galicia co resultado de 2-5. A pesar da diferencia no marcador, as galegas sufriron bastante na primeira metade e non encontraron o seu xogo durante os primeiros 20 minutos.
Diego Pardo, adestrador do Valdetires: “Na primeira parte estivemos moi imprecisas e con falta de ritmo. Na segunda parte saímos con máis ganas e fomos superiores”.
Todos mudou tras o tempo de lecer, e as ferrolás deron volta ao marcador, que no descanso marcaba 2-1 para as locais: “Na primeira parte estivemos moi imprecisas e con falta de ritmo. Na segunda parte saímos con máis ganas e fomos superiores. Tivemos máis ocasións e ao final 2-5 e mesmo a vantaxe puido ser máis amplía”, comentu Pardo tras o pitido final.
A nota positiva do partido, foi o debut da gardamallas Andrea Pasos coas verdibrancas. No outro lado da balanza, foi a baixa de Lía Mesías que finalmente non se puido vestir de corto debido ás molestias que arrastraba durante a previa.
