Os equipos galegos de fútbol sala volven á competición regular tras rematar os seus periodos de illamento, e no caso do Poio Pescamar e o Viaxes Amarelle o farán cun derbi galego este domingo, 7 de febreiro, ás 19:00 horas no pavillón de A Seca (Poio).
Malia estar en dúas posicións moi distintas da clasificación, este duelo promete ser de alto nivel. Por un lado, as locais, o Poio Pescamar é un dos claros aspirantes a loitar polo título de Liga. Vixente subcampión da Copa da Raíña, este equipo ocupa actualmente a segunda posición da táboa do Grupo A, tres puntos por debaixo do Futsi Atlético Navalcarnero.
O conxunto de Manuel Cossío suma 27 goles a favor, anotados nos oito partidos que leva disputados esta tempada. Con seis vitorias, un empate e unha derrota, o Poio é un rival duro que non concede ocasións fáciles.
Pola súa banda, o Viaxes Amarelle ocupa a terceira posición pola cola. Con seis puntos, logrados en dúas vitorias, as xogadoras dirixidas por Jorge Basanta están a cinco puntos do colista e 12 do cuarto clasificado da Primeira División de futsal.
Esta será unha nova oportunidade para as coruñesas de reclamar este derbi galego. Na ida, o trunfo foi para as entón visitantes, que remataron o encontro cun 0-3, grazas ao hat trick de Dani Sousa.
Nesta segunda volta, a afección poderá seguir o encontro entre Poio e Viaxes Amarelle na TVG2 e no streaming da web de directos da CRTVG.
Poio e Amarelle remataron esta semana o seu illamento
O pasado 12 de xaneiro o Poio Pescamar anunciaba que tiña tres casos positivos en COVID-19 no seu club. Esta noticia alonxounas das pistas para competir e adestrar, pero este luns volveron á carga.
Durante este periodo de corentena, o equipo galego tivo que adiar tres partidos, contra CD Leganés, STV Roldán e Cidade de As Burgas.
Algo semellante lle pasou ás compoñentes do Viaxes Amarelle. O 21 de xaneiro as herculinas realizaron probas para comprobar se tiñan algunha persoa contaxiada no club, tras coñecer os casos do Envialia, o seu último rival. Os resultados saíron positivos e procederon a activar o protocolo.
Desta forma, na tarde do xoves futbolistas e corpo técnico volveron a someterse aos tests de antíxenos, conseguindo un pleno de negativos, e retomaron así as sesións de traballo.
Desde entón, o Amarelle está adestrando para recuperar o ritmo e as sensacións, con sesións o xoves, venres, sábado e o mesmo domingo pola mañá. O obxectivo das que serán visitantes neste derbi galego é dar a sorpresa e arrebatarlle os puntos ao Poio.
