Ata o momento parecía que o Viaxes Amarelle estaba esquivando á COVID-19. Pero esta semana, tras coñecer os casos detectados no Ourense Envialia, o seu último rival, o equipo coruñés realizou tests de antíxenos que resultaron positivos en dous xogadoras.
As futbolistas non presentan síntomas e o Viaxes Amarelle xa iniciou o protocolo necesario nestas situacións. Así, o conxunto e staff técnico que estivo en contacto con elas pasará unha corentena de dez días.
Nun principio, esta semana o cadro herculino non tiña que realizar os tests. O seu partido ante o Penya Esplugues está adiado por contaxios no cadro catalán, pero as galegas decidiron realizalos por precaución tras a noticia do Ourense Envialia.
O club coruñés xa deu aviso ás entidades pertinentes: Real Federación Galega de Fútbol, Real Federación Española de Fútbol, Concello da Coruña e SERGAS.
Desta forma, as persoas illadas pasarán unha PCR ao finalizar o período de corentena. Polo momento, os adestramentos están suspendidos e o equipo seguirá traballando desde casa o aspecto físico.
A COVID-19 obriga a aprazar partidos do Amarelle e outros equipos
O Amarelle está tamén á espera de confirmar o aprazamento do partido ante o Leganés, previsto para o sábado, 30 de xaneiro, xa que a corentena terminaría o día 31.
Con este xa son catro os equipos galegos de futsal que teñen xogadoras contaxiadas. O Poio Pescamar, o Pescados Rubén Burela, e o Ourense Envialia tamén tiveron que adiar partidos por este motivo.
