O conxunto herculino do Viaxes Amarelle, así como o 5 Coruña, inicia esta fin de semana a competición oficial da Segunda División de fútbol sala. As coruñesas forman parte do Grupo 1, onde tamén militarán Ourense Envialia B, Bembrive, A Fervenza FS, 5 Coruña, Valdetires Ferrol FSF, Cidade de As Burgas e o FSF Castro.
O Amarelle
No caso do grupo de Jorge Basanta, esta xornada marcará o camiño de volta á Primera División, despois de descender da máxima categoría na pasada campaña. Esta fin de semana xogará tras oito semanas de pretempada. Dous meses no que o equipo técnico traballou para que o equipo chegue nas mellores condicións ao inicio da competición ligueira.
Despois de catro amigables, o do Amarelle chega en boa forma á competición oficial. O seu primeiro partido será ante o UDC Txantrea KKE, o sábado ás 18:00 horas. Este equipo é un rival directo para as galegas, xa que na pasada campaña loitou polo ascenso de categoría, praza que finalmente iría para o Marín Futsal.
Basanta conta coas porteiras Sandra Rodríguez e Leti Rojo, así como as futbolistas Candela, Patri Romaní, Cris Lourés, Èlia Gullí, Yaiza, Lau Doce, María Gómez, Irune e Carlita.
O 5 Coruña
Esta fin de semana tamén será especial para o 5 Coruña, que debuta en categoría nacional tras lograr o ascenso a pasada tempada, despois de vencer ao Cidade de Pontevedra. Con Fani Martínez á fronte do proxecto, quen xa fóra adestradora do equipo que logrou o ascenso hai dous anos á Preferente.
A meta das coruñesas pasa pola permanencia e o seu primeiro reto é superar ao Spring Cider Rodiles FSF, co que xogarán o sábado ás 18:00 horas.
Ao plantel xa establecido do ano pasado, sumáronse Albita á ala e María Romero, canteirana. Foron baixa Anita Lago, retirada, e Nere.
Duelo galego entre Cidade de As Burgas e FSF Castro
A primeira xornada abrirase cun duelo galego, o primeiro da tempada. O Cidade de As Burgas, descendido da Primera División, recibirá nos Remedios ao FSF Castro. O partido será o sábado ás 16:30 horas.
‼️EMPEZAMOS‼️
Este sábado jugamos en casa ante el @Castrofutsalfem y queremos verte en la grada animando. No esperes más, reserva tu asiento y disfruta del partido.
¡RESERVA TU SITIO! 👇https://t.co/rhL3rokS4S pic.twitter.com/iHQoJHuqJp— Cidade de As Burgas FS (@cidadeasburgas) October 7, 2021
O Ourense Envialia B
O filial do Ourense Envialia inciará unha tempada máis na categoría de prata, unha por debaixo do seu equipo sénior, co obxectivo de seguir mantendo unha canteira de alto nivel. As ourensás competirán neste primeiro partido ante o Viuda de Sainz Gora, o sábado ás 18:30 horas.
O Bembrive
Outro galego que veremos esta tempada na Segunda División é o Bembrive de Vigo, que nesta pretempada foi tamén un dos participantes da Copa Galicia, onde caeu eliminado ante o primeiro equipo do Ourense Envialia nos cuartos de final.
Este sábado, as viguesas enfrontaranse ao CD Universidad de Salamanca ás 19:30 horas actuando como locais.
O Fervenza
As ferrolás do Fervenza tamén comezarán un novo curso na categoría de prata, viaxando a Logroño para disputar o sábado o partido ante o Logroño Promesas EDF ás 20:00 horas. As xogadoras de Nacho García chegan dunha pretempada de amigables e adestramentos, co obxectivo de aprender, desfrutar e salvar a categoría cun equipo baseado na canteira.
O Valdetires
Un equipo en dificultades para competir será o Valdetires Ferrol FSF. As ferrolás denunciaron antes do comezo da competición os problemas económicos polos que están a pasar e solicitaron axuda para facer fronte á presente tempada. Finalmente, o pleno ferrolán aprobou por unanimidade solucionar a débeda económica do club.
Polo de agora, o Valdetires comezará a competir con normalidade nesta xornada, que as enfronta ao AD Mioño FSF, o domingo 10 ás 12:00 horas.
