Igualdade na cancha e no electrónico. Eso foi o que se viu no Municipal da Sagrada Familia da Coruña entre o Viaxes Amarelle e o Cidade de As Burgas GLS . Ambas as dúas escuadras galegas chegaban a este duelo galaico necesitadas de puntos e repartíronos. O gol do empate que puña o resultado 2-2 conseguíao Anna Escribano no último tramo do partido.
O Viaxes Amarelle FSF salvaba onte un punto, in extremis, nun emocionante derbi galego fronte ao Cidade de As Burgas FSF GLS . As ourensás acariñaron un trunfo a domicilio que lles daría folgos e uns puntos que precisan como auga de maio. Abría o marcador Nespereira (0-1) que estivo exquisita na zaga verdibranca, empatou na segunda metade Candela (1-1) e Clara Fernández adiantaba as das Burgas. Ana Lastra vía como un tiro de 10 metros se ía fóra sen que tivese que tocar o esférico co 1-2, pero pouco despois Anna Escribano batía á cancerbeira ourensá e igualaba novamente o encontro no minuto 40 (2-2).
Para as coruñesas do Viaxes Amarelle FSF o encontro era o seu terceiro derbi galego neste ano 2021, e ademais consecutivo, para máis INRI medíanse contra un rival directo na loita por evitar o descenso. As herculinas non tiveron o seu mellor día, pero salvaron un punto cun gol de Anna Escribano, a falta de 15 segundos para a bucina.
O partido empezaba moi equilibrado, pero con apostas diferenciadas sobre o xogo. Mentres as herculinas optaban por elaborar máis o xogo e ter a posesión do balón, o conxunto visitante optaba por unha presión alta e xogar moi directo sobre a portaría do Viaxes Amarelle FSF.
A pesar das intencións, ningún dos dous equipos ía máis aló de tratar de sorprender ao contrario con disparos exteriores desde un dez metros, sen maiores dificultades para as porteiras dos seus respectivos equipos.
Pero a falta de dous minutos para chegar ao intermedio, Lucía Nespereira cun potente disparo cruzado, enganchaba a portaría herculina polo primeiro pau, e puña ás visitantes por diante no luminoso. As locais tratarían, con máis intensidade, de igualar a contenda nos últimos minutos, pero o partido iríase ao descanso co parcial de 0-1, para o Cidade de As Burgas FSF GLS .
Xa na segunda parte partido empezaba cun Viaxes Amarelle FSF que case sorprende na xogada de saque de centro cunha xogada elaborada; pero o gol séguese resistindo para as locais. As herculinas insistían no xogo elaborado e tamén en buscar porta para igualar a contenda. Ao cabo dos minutos, terminariano conseguindo. A autora do gol foi Candela Soria que, mediado o segundo periodo de xogo, xirábase na frontal da área e cruzaba o balón ao pau contrario de Ana Lastra para pór a igualada no luminoso do Pavillón coruñés da Sagrada Familia.
Con este gol, o Viaxes Amarelle FSF veu arriba e mostrábase máis confiado no xogo de ataque para dar a volta ao marcador, e tentar aproveitar o cansazo das visitantes. Pero, por contra, terminaron por ser as futbolistas que adestra Manolo Codeso as que sorprendían as adestradas por Jorge Basanta falta de sete minutos. Entre Clara Fernández e Fara Antolín rouron unha pelota en primeira liña e armaron unha rápida transición. O tanto asinouno Clara Fernández rematando a pracer ao segundo pau.
Co 1-2 no marcador, as herculinas tiñan que esforzarse un punto máis para non deixar escapar os puntos fronte a un rival directo. O Cidade de As Burgas GLS defendía en zona moi concentrado en evitar ocos polos que os tiros ou os pases das laranxas se achegasen á meta defendida por Ana Lastra. A intensidade defensiva fixo que chegase a quinta falta das ourensás.
O Viaxes Amarelle FSF sufría para xerar perigo e Jorge Basanta arriscou e optou polo xogo de cinco, a falta de catro minutos. A defensa pechada do Cidade de As Burgas FSF GLS parecía imposible, pero ás de Codeso se lles atraganta precisamente esa opción de porteira xogadora e finalmente, as coruñesas viron porta.
Estiveron a punto de facelo a balón parado, cando a falta dun minuto, chegaba a sexta falta das visitantes, por unha man de Sonia Pacios. Anna Escribano probaba cun disparo de dez metros, que se iría por fóra. Pero a catalá terminaría por resarcirse a falta de quince segundos; cando finalizaba dentro da área un pase de Lau Doce, mentres o Viaxes Amarelle FSF estaba en xogo de cinco.
Aínda quedaba tempo por diante, pero o gol resistíase para ambas as escuadras e o partido chegaría ao seu final cun marcador de 2-2, e repartición de puntos, que non terminaba por satisfacer a ningún dos dous equipos.
Sen movementos na táboa para Amarelle e Cidade
Este empate, sumado ao descanso esta xornada da Penya Esplugues e a derrota do Teldeportivo co Poio Pescamar (1-4) fai que a clasificación non se mude na zona baixa. O único que está algo adiantando é o CD Leganés pero non puido poñer máis terra de por medio esta fin de semana ao perder 6-0 co Futsi Atlético Navalcarnero.
Tras a disputa deste novo encontro da competición regular, o Viaxes Amarelle FSF regresa o luns aos adestramentos; para afrontar un difícil encontro contra un dos rivais que optan ao título na Primeira División Nacional Feminina de Fútbol sala, onde o cadro herculino disputará a décimo quinta xornada do Subgrupo A, o sábado 20 de febreiro de 2021 ás 16:00 horas no Pavillón Municipal Gabriel Pérez Sánchez (Torre-Pacheco) visitando ao STV Roldán FSF.
Pola súa parte, o Cidade de As Burgas GLS terá enfronte outra vez a un rival directo pola permanencia pero, sobre o papel, un chisco máis asequible: o Teldeportivo que segue sen facerse coa categoría e que unicamente colleitou un punto tras dez partidos disputados. Xustamente o fixo na primeira volta ante as de Manolo Codeso coas que empataban 3-3.
FICHA TÉCNICA
VIAXES AMARELLE FSF: Leti Rojo, Lau Doce, Anna Escribano, Patri Corral e Candela Soria – quinteto inicial -. Tamén xogaron: María Gómez, Cris Lourés, Yaiza e Sofía.
CIDADE DE AS BURGAS FSF: Ana Lastra, Lucía Nespereira, Sol Pedrera, Fara Antolín e Clara Fernández – quinteto inicial -. Tamén xogaron: Sonia Pacios, Nahir Oliveira, Amelia, Canolich, Aroa e Mariola.
GOLES: 0-1 Lucía Nespereira (min. 18); 1-1 Candela Soria (min. 28); 1-2 Clara Fernández (min. 33); 2-2 Anna Escribano (min. 40).
ÁRBITROS: Hevia Campa e Palma Menéndez do Colexio de Árbitros de Asturias e Cantabria. Mesa: Fernández Vega do Colexio de Árbitros de Asturias. Amonestaron polas locais á xogadora María Gómez, e aos membros do corpo técnico: Jorge Basanta, Diego Rodríguez e Toni Lodeiro con cartón amelo. Mentres que no Cidade de As Burgas, foron sancionadas con cartón a marelo Mariola e Sol Pedrera.
INCIDENCIAS: Partido correspondente á 14ª xornada do Subgrupo A da Primeira División Nacional Feminina de Fútbol Sala disputado a porta pechada (por mor das restricións a causa da COVID-19) no Pavillón Municipal de Sagrada Familia (A Coruña) entre o Viaxes Amarelle FSF e o Cidade de As Burgas FSF.
