Durante a pasada fin de semana, a Delegación de Lugo daba acollida ao Campionato Xunta de Galicia Sub-16 e Sub-18 individual e de probas combinadas, no cal Alicia Barreiro acadou un novo récord galego na proba dos 300 metros Sub-16.
A competición, que contaría con moitas probas e concursos de enorme calidade e interese, deixou un reparto de medallas entre os distintos clubs participantes.
Entre os resultados femininos, o máis salientable en foi o novo récord galego en 300 metros Sub-16, establecido sobre o sintético do Gregorio Pérez Rivera de Lugo.
A atleta Alicia Barreiro, do Ría Ferrol, participou na proba dos 300 m. e lograba parar o crono na final en 40.67. Con esta marca, a deportista acada un novo tope autonómico, colocándoa de igual xeito nos postos altos do ránking nacional do ano.
Os resultados Sub-16 do campionato
Dentro da competición Sub-16, en valos houbo unha clara triunfadora. Adriana Rial, do Samertolameu, proclamouse campioa con 15.61 nos 100 valos e 47.11 sobre os 300 valos.
No concurso dos 1.500 obstáculos os 5:17.06 de Sara Guedes, da Atlética Lucense, merecéronlle a medalla de ouro.
Nos saltos Lisa Vosberg quedaba alonxada dos seus 3.40, domiñando con 3.00 m. no concurso de pértega. Xa en lanzamentos Lara Iglesias, do Samertolameu, conseguía con 38.35 m . pulverizar a súa MMP en casi cinco metros
Dobre triunfo para Gema Dacosta, do Vila de Cangas, en peso con 11.69 m. e disco con 33.58 m.
Pola súa banda, a campioa de España e plusmarquista nacional Xela Martínez, da Atlética Lucense, tomaba parte sobre os 3.000 m. con vistas ao nacional logrando comodamente o campionato con 10:56.86.
As atletas triunfadoras no Sub-18
Xa na categoría Sub-18 domiño de Ainhoa Reparaz, do Val Miñor, sobre as probas de velocidade logrando o triunfo tanto nos 100 m. con 12.32 como nos 200 m. con 25.97
Nos saltos, o máximo interese estaba no foso de triplo con ese man a man mantido entre Alba Cuns, do Playas de Castellón, e Diaou Diallo, do Ría Ferrol. A de Negreira que viña ca mellor marca nacional de 12.72 m. e o seu sexto posto do Campionato nacional absoluto, viuse superada pola ferrolá quen marchaba ata os 12.89 m no seu terceiro intento, malia que cun vendabal de vento a favor de +4,6.
Xiana Lago, do Ría Ferrol, nos concursos de lanzamentos, facíase cos títulos autonómicos de peso con 14.31 m. e cun destacado disco no que lanzaba ata os 38.61.
Ver esta publicación en Instagram
Interesante disputa entre Marta Neira, do AVA, e Blanca Pereira, do Ourense Atletismo, en martelo, con triunfo final para a viguesa con 55.28 polos 54.47 de Pereira.
O Campionato de probas combinadas
Na outra parte do Campionato da Xunta de Galicia, a relativa ás probas combinadas, dúas atletas resultaron campionas femininas.
Carlota Salgado, do Atletismo Fem. Celta, alzouse co ouro no heptathlon Sub-18, con 4.089 puntos. Pola súa banda, Marta Lázara, do Atletismo Deza, fixo o propio no hexathlon Sub-16, con 3.160 puntos.
