O lema “a unión fai a forza”, baseado nas verbas en latín “concordia res parvae crescunt” do escritor romano Salustio, é empregado en moitos ámbitos da nosa vida. En 2003, tres dos clubs máis representativos de Ourense decidiron seguir esta idea e unirse para acadar un obxectivo: poder competir nas mesmas condicións con outros clubs autonómicos e nacionais.
A historia do club
O Club Grupo Academia Postal, o Club Pavillón Subita e o Club Ben-Cho-Shey de Pereiro de Aguiar formalizaron unha nova entidade que, por acordo das tres directivas, pasaría a chamarse Club Ourense Atletismo Academia Postal e estaría presidido por Francisco Nóvoa Rodríguez.
Esta unión resultou moi beneficiosa xa que os e as atletas máis importantes de cada un dos tres equipos pasaron a formar parte dun mesmo proxecto. Deste xeito, o primeiro ano de vida da nova asociación o equipo masculino acadou o ascenso a División de Honra, mentres que o feminino se quedou a piques de conseguilo.
Ata o 2012, o Club Ourense Atletismo Academia Postal mantivo as súas dúas seccións nas dúas máximas categorías a nivel nacional, gañando máis de 1.600 medallas en todas as competicións disputadas e enviando a varios atletas a Xogos Olímpicos: Santiago Pérez Alonso, Marta Míguez, Jorge Silva, Lorena Luaces ou Alfonso Palomanes son os nomes máis destacados desta etapa.
As dificultades económicas que rodearon a toda a sociedade durante os primeiros anos da segunda década do século XXI tamén afectaron ao club e aos seus patrocinadores. A perda de apoio do Grupo Academia Postal motivou a renomeamento como Club Ourense Atletismo, o cambio nos obxectivos deportivos e a elección dun novo presidente, José Antonio Álvarez Pérez, que actualmente continúa ao cargo da directiva.
A partir desde momento as categorías base convertéronse en prioridade para o club coa intención de formar a novos atletas con fin de consolidar, a medio e largo prazo, o futuro deportivo do equipo. Ademais, tamén se crearon novas seccións, como as de Triatlón, Montañismo e Deporte Adaptado.
2021, fin a unha década sen participación na Liga Nacional de equipos
O 13 de xuño de 2021 o Club Ourense Atletismo puxo fin a dez anos se competir na Liga Nacional. O equipo feminino absoluto da entidad formou parte dun dos grupos da Segunda División, onde se subiu ao terceiro chanzo do podio, todo un logro despois de tanto tempo sen estar nunha competición deste nivel.
A nivel autonómico, en torneos por equipos acadáronse outros catro podios máis: na sección feminina, o absoluto conseguiu o terceiro posto, mentres que o igual que o sub-20 e o sub-12 foron segundos. Por outra banda, os atletas sub-14 masculino tamén acadaron o segundo posto a nivel galego.
José Antonio Álvarez Pérez, presidente do Club Ourense Atletismo: “No feminino hai máis nivel, como se puido ver na Liga Nacional, á que só foi o equipo de mulleres”
O presidente do club, José Antonio Álvarez Pérez, destaca que o equipo feminino de atletismo é agora a prioridade da directiva. “No feminino hai máis nivel, como se puido ver na Liga Nacional, á que só foi o equipo de mulleres”, afirmou o directivo.
Edymar Brea, a atleta máis destacada do Club Ourense Atletismo
A atleta venezolana pertencente ao equipo ourensán conseguiu dous ouros a nivel internacional, alzándose coa vitoria nas probas de 5.000 e 10.000 metros lisos no Suramericano de Atletismo celebrado en Guayaquil o pasado maio. Ademais, no campionato estatal celebrado en Torrevieja en maio pulverizou o récord do seus país nos 10.000 metros, conseguindo unha marca de 33.09,93 e o segundo posto.
En categorías inferiores o nome a destacar neste club ourensán é o da deportista Blanca Pereira, que se proclamou campioa de España no 2021 na modalidade de lanzamento de martelo. Blanca obtivo tamén varios podios e chegou a competir a nivel internacional representando a España.
Dentro da sección máster o nome a destacar é o de Rubén Diz que foi campión nacional M40 nos 10.000 metros e segundo nos 5.000 metros. Tamén é salientable a achega doutro deportista, Alejandro Fernández. Neste caso falamos dun atleta que conseguiu a medalla de prata nos 10 km en ruta dentro da categoría máster M35.
En conxunto, en todas as competicións individuais nas que participaron atletas do Club Ourense Atletismo conseguíronse 128 medallas, sendo dúas delas (as de Edymar Brea) a nivel internacional, oito a nivel nacional e 118 a nivel autonómico.
Deporte e valores sociais, unidos da man
“Aínda que coa pandemia se paralizou todo un pouco, a sección de deporte adaptado é moi importante para nós”, afirmou o presidente, José Antonio Álvarez, engadindo que desde se creou esa parte do club “sempre intentamos acoller a todas as persoas que demostraron interese sobre o atletismo, axudalas e sobre todo, integralas”.
José Antonio Álvarez, presidente do Club Ourense Atletismo: “Aínda que coa pandemia se paralizou todo un pouco, a sección de deporte adaptado é moi importante para nós”
Alejandro Montero é o atleta máis importante nesta sección, xa que foi seleccionado varias veces pola Federación Española de Discapacitados Intelectuais, para representar a España e conta con varios títulos a nivel nacional e internacional.
A difusión deste deporte tamén é outro dos obxectivos desta directiva, facendo xornadas de portas abertas e visitas as colexios e institucións para que a rapazada o coñeza, probe e se una. E se este proxecto comezaba cunha unión de varios equipos, a día de hoxe continúan con esta labor.
Todos os anos ofrecen a equipos da provincia de Ourense, pero tamén doutras provincias galegas, a posibilidade de crear acordos de colaboración entre eles, co obxectivo de axudar a clubs máis pequenos cos seus medios. “Hai algúns que se van, outros que veñen, pero coa maior parte temos moita afinidade e sempre acabamos renovando estes contratos”, sentencia o presidente, José Antonio Álvarez.
