O Peluquería Mixta Friol estreou a pasada xornada da Liga Reto Iberdrola a súa primeira vitoria do ano e tamén xogadora dentro do campo. A nova cara do club lucense foi Ali Carranza, que debutou coa elástica amarela xustamente ante o seu ex equipo.
O partido foi ante o CD Parquesol, curiosamente o anterior conxunto da que xa é nova futbolista do Friol. A deportista ten 24 anos, é natural de Valladolid, e chega a Galicia despois de militar durante sete anos no conxunto vallisoletano. Con este equipo logrou ser a máxima goleadora do club na súa historia.
Carranza, dianteira de área, sabe “estar sempre no lugar e momento adecuado”, segundo din desde o propio Friol. Unha das súas calidades está no xogo aéreo e na súa presión ás futbolistas centrais do contrincante.
A nova 22 das galegas puido estrear xa a camisola amarela. A futbolista debutou no encontro celebrado a pasada fin de semana en Friol, comezando con bo pé, ao lograr a primeira vitoria do 2021. Un trunfo importantísimo, que achega ás galegas ao obxectivo da permanencia. Este encontro foi tamén o debut do novo adestrador, José Manuel Ponfe.
