O Durán Maquinaria Ensino ten nova xogadora. A italiana Alessandra Orsili chega a Lugo para competir na vindeira tempada 2021/2022 co club galego na LF Endesa. Esta xogadora é o quinto reforzo do equipo, despois de Tamara Abalde, Georgina Bahí, Sofía da Silva e María Eraunzetamurgil.
A base de 170 cm é internacional con Italia e, malia a súa xuventude (ten só 19 anos), foi unha xogadora destacada do Gesam Gas E Luce Le Mura Lucca, conxunto co que competiu nas últimas dúas tempadas na Serie A1 da LegaBasket Femminile, a máxima categoría italiana.
Nesta última campaña, Orsili anotou 264 puntos en 27 partidos disputados, acadando unha valoración de 251 créditos. A italiana tivo unha media de acerto do 45% nos tiros de dous e do 43% nos tiros de tres, sendo a súa mellor cifra o tiro libre, cun 76% de eficacia.
O palmarés de Orsili
Como internacional, a nova base do Durán Maquinaria Ensino ten no seu haber dous ouros do Europeo de Bosnia e Herzegovina do 2019, obtidos coa Selección Italiana sub18 e no Europeo sub20 da República Checa do mesmo ano. Neste torneo sumou 132 minutos sobre a pista, anotando un total de 49 puntos, 13 deles na final ante Rusia. Tamén ten un bronce, acadado coa Selección sub16 no Campionato de Europa de Francia do ano 2017.
Gracias una vez más por participar en una nueva presentación del club. Y sobre todo, bienvenida Alessandra Orsili!!!!
Con todos vosotros, la nueva guerrera lucense 📹🎁 pic.twitter.com/NJYN5IZx12
— Ensino Lugo (@EnsinoLugoCB) May 24, 2021
