Catro partidos e sete puntos despois, o Autos Cancela Zalaeta ocupa a cuarta posición da clasificación da Superliga Femenina 2 de Voleibol. A perda da súa máxima anotadora do curso anterior, Emma Ordoñez, fichada polo Sanaya Libby’s La Laguna non está a ser un handicap para as coruñesas.
Alba Quirós está perfilándose esta tempada como a xogadora máis destacada do conxunto dirixido por Jorge Barrero. A oposta foi engadida nas mellores da xornada escollidas pola Federación como terceira mellor atacante, sacadora e anotadora da cuarta xornada. Desde o debut da tempada 2020 – 2021, Quirós logrou anotar 12 puntos no encontro contra o CV Torrejón da terceira xornada e 26 contra o VP Madrid na seguinte cita. En total, a canaria anotou 70 puntos en catro partidos.
Xunto á renovación de Quirós e do resto do equipo, o Autos Cancela Zalaeta mantén a maior parte do plantel que posicionou ao club no quinta posto no momento da suspensión da tempada anterior por mor da pandemia de COVID-19. Ás estas xogadoras uníronse dúas fichaxes: a receptora María Forteza e Paula Santos, procedente da canteira do CV Emevé.
Os números acompañan ao Zalaeta
O club confía nas súas xogadoras e os resultados validan esta decisión. Nunha categoría moi igualada, as coruñesas gañaron xa dous partidos de tres puntos e soamente perderon dous, nun dos cales sumaron un punto. No relativo aos sets do que vai de curso o Zalaeta conta con oito a favor e seis en contra.
O conxunto coruñés non puido estrearse na segunda xornada (cada semana descansa un equipo ao ser un número impar) cunha vitoria 3-0 en casa. As xogadoras de Barrero impuxeron o seu xogo contra o Futura Center Arena Rivas xa no primeiro set e seguiron dominando durante o resto do encontro.
Para o seguinte duelo deportivo, o Zalaeta desprazouse a Madrid para o partido contra o CV Torrejón. As herculinas asinaron un moi bo primeiro set, impedindo que as locais remontasen o resultado, malia un segundo e terceiro set máis igualado. Outra xornada máis, o Autos Cancela Zalaeta sumou os tres puntos.
A racha comezaría a perderse contra outro equipo de Madrid. Na cuarta xornada, o Zalaeta enfrontouse en casa ao VP Madrid, nun partido moi igualado. Tanto, que tivo que resolverse no tie-break a favor das visitantes 11-15. Cun resultado final de 2-3, as galegas conseguiron rascar un punto.
Non tiveron tanta sorte contra o CV Leganés. As coruñesas puxéronlle as cousas difíciles ás líderes da Superliga Femenina 2, impoñéndose nos primeiros minutos de cada set. Porén, non foi suficiente, e as madrileñas lograban remontar cada parte do partido.
Para esta xornada, as xogadoras que adestra Barrero contan con retomar as boas sensacións na Sagrada Familia. O seguinte duelo, contra o Voley Sanse Live Vuvuzela, disputarase o sábado 14 de novembro a porta pechada.
Ver esta publicación en Instagram
