O Dépor ABANCA segue vivo na loita pola salvación e afronta os seguintes partidos coa motivación de ter gañado na primeira final, ante o RCD Espanyol. Os tres puntos chegaron da bota de Alba Merino, autora do gol do trunfo no partido ante as pericas. A centrocampista branquiazul confía nas súas compañeiras para a consecución do obxectivo, e asegura que “nunca damos nada por perdido. Sempre o demostramos e pelexamos cada partido ata o final e non baixamos os brazos”.
Non está a ser unha tempada doada, e a extremeña admite que “este é un ano no que estou sufrindo moitísimo desde o principio pola situación na que estamos”. Con todo, isto non merma a moral do Dépor ABANCA, e todas as futbolistas coinciden en que “mentres haxa opcións imos dalo todo e intentar conseguir o obxectivo da permanencia”.
Alba Merino: “Mentres haxa opcións imos dalo todo e intentar conseguir o obxectivo da permanencia”
Tras sumar tres puntos valiosísimos ante o Espanyol, as deportivistas están “con moitísimas ganas de seguir puntuando, de seguir conseguindo puntos, que é o que necesitamos para conseguir a permanencia”. Merino ten claro que “pódese” conseguir a permanencia, e asegura que todo o plantel confía nas súas posibilidades e loitará por acadala.
Un paso importantísimo foi a vitoria conseguida na última xornada en casa, na que a vitoria chegou da man dun gol da centrocampista. A futbolista recibiu o balón de Gaby e rematou con seguridade coa cabeza ante a gardameta rival, asinando a remontada ante o Espanyol no tramo final do partido, cando o marcador xa anunciaba o minuto 78. O tanto, que se traduce nun aumento das posibilidades de salvación para as branquiazuis, desatou un estoupido de xúbilo nas filas coruñesas.
Sobre esta celebración, Merino asegurou que foi un gol especial “polo que nos xogabamos. Era un partido que había que gañar si ou si. Comezamos perdendo e era o gol da remontada e de aí ese xesto de rabia. Foi un gol importante, que serve para sumar esa vitoria”.
Reencontro co Atlético de Madrid
Polo de agora, no vestiario coruñés prefiren non facer números, porque “non sabemos cantos puntos necesitaremos, así que cantos máis fagamos mellor. Somos moitos equipos implicados e hai que sacar o máximo número posible”.
Alba Merino: “Imos a Madrid a intentar sumar, sabemos que é un partido difícil, pero a nosa intención é saír a polos tres puntos e puntuar”
Con esta mentalidade viaxa o Dépor ABANCA a Madrid, para disputar o encontro aprazado co Atlético de Madrid, previsto para este mesmo mércores. “Imos a Madrid a intentar sumar, sabemos que é un partido difícil, pero a nosa intención é saír a polos tres puntos e puntuar”, afirma a xogadora.
Non será doado. As madrileñas son un equipo forte, que está a ter unha tempada irregular, pero xa foron quen de golear ás deportivistas en Riazor. Merino admite sobre o seu ex equipo que “non están tendo o seu ano, pero teñen un plantel de primeiro nivel, con xogadoras moi boas e a maioría internacionais. Esperamos un partido complicado, pero imos a polos tres puntos”.
O regreso de Lía
As baixas rotacións neste plantel curto están a pasar factura nas branquiazuis, e Merino confirma que “chegamos ao final dos partidos un pouco máis xustas, pero estamos traballando para chegar nas mellores condicións posibles”. Como parte da solución está a volta de Lía ao equipo, unha xogadora que a centrocampista calificou dunha “calidade impresionante”.
Alba Merino: “(Lía) darao todo, como deportivista que é desde pequena”
Para a extremeña, o regreso da galega “vainos dar ese aire fresco que necesitamos nos partidos. Estivo xa nun par de adestramentos e darao todo, como deportivista que é desde pequena. E para nós é un orgullo que volva”.
Merino aínda non pensa no seu futuro
Malia os resultados do equipo, a nivel individual esta está a ser unha gran tempada para Alba Merino. Actualmente é a segunda máxima goleadora con oito tantos, e ela mesma admite que “facía moitísimos anos que non conseguía marcar tantos goles”.
Isto vese facilitado polas súas compañeiras. “Agora teño máis tranquilidade de que tanto Gaby como Ainoa fan un traballo defensivo espectacular e iso dame máis liberdade para chegar á área”. Porén, o seu rol no equipo non cambia.
Alba Merino: “Estou centrada nas xornadas que quedan e en conseguir a permanencia co club”
O que continúa a ser unha incógnita é o seu futuro. O contrato de Merino remata o vindeiro 30 de xuño, cando “teremos que falar as dúas partes”, pero a futbolista aínda non quere pensar no futuro. “Agora mesmo non me preocupa. Estou centrada nas xornadas que quedan e en conseguir a permanencia co club”, asegura.
