A autora do gol deportivista, Alba Merino, atendía aos medios de comunicación tras o choque e declaraba que este cruzamento ante o Sporting Huelva no que as galegas venceron por 1-0, foi “un partido moi disputado, traballado e sufrido. Custounos conseguir o tres puntos, pero traballamos para iso e creo que fomos superiores”.
Preguntada sobre se o equipo xogou con maior fluidez, explicaba que as branquiazuis están “a adestrar para ter balón, gañar fluidez… aos poucos creo que se vai a ver un Dépor como o que era”, prognosticaba a futbolista.
Alba Merino asinaba o gol do triunfo branquiazul, un tanto froito dun canonazo da deportivista no que, como ela mesma confesaba pegoulle ao balón “coa alma”.
Outro dos logros do equipo que adestra Manu Sánchez é que o Dépor ABANCA conseguía non encaixar goles. “Queriamos manter a portaría a cero, é algo que nos dá un plus, e conseguímolo. Así que estamos moi contentas”, confesaba Alba Merino á prensa tras o choque.
Un gol que vale un mundo e deixa ao Dépor a un trunfo da salvación
Este triunfo non libera do faroliño vermello ao RC Deportivo ABANCA, pero coloca ao conxunto coruñés de novo na pomada da loita pola permanencia. As coruñesas están a só tres puntos (unha vitoria) do posto que delimita manter a categoría. Por iso, Alba Merino explicaba que este triunfo “animicamente é un paso moi grande, collemos moral, recuperamos as sensacións que queriamos ter… É un triunfo moi importante”, aseveraba a capitá do conxunto galego.
No vestiario branquiazul a alegría, a festa e “os móbiles e os selfies” de celebración reapareceron. O domingo, as galegas volven á competición con outro novo encontro vital para as súas aspiracións de seguir na elite estatal o próximo curso.
