O Dépor ABANCA retoma a liga Reto Iberdrola no grupo norte coa visita do CD Pradejón a Abegondo prevista para hoxe sábado 16 ás 12:00 h nun partido correspondente á 24ª xornada da competición ligueira. A gran novidade na convocatoria é a presenza da capitá Alba Merino, que recibiu ao longo da semana a alta médica despois de varios meses recuperándose dunha lesión de xeonllo.
Na lista de convocadas tamén se estrea a xogadora internacional ucraína Viktoriia Hiryn coñecida futbolísticamente como Vika (Novoukrainka, Volynska, Ucraína, 24 de novembro de 2000), que se incorporou o pasado mes de marzo ao Dépor ABANCA após ter que deixar o seu país pola invasión militar rusa que sufren.
Por contra, o adestrador das branquiazuis, Miguel Llorente, non poderá contar con Ainhoa Marín, expulsada por dobre amoestación no último partido ligueiro; nin coas lesionadas: Cris Martínez, Andrea Sierra e María Sampalo, esta a consecuencia dunha lesión muscular nun cuádriceps.
Aroa Guerra, Reigosa, Paula Novo e Martina Rivas son as representantes do filial na convocatoria de 20 futbolistas nunha semana na que o Dépor ABANCA celebra a citación de Paula Novo pola selección española sub-17 feminina para uns adestramentos na localidade segoviana de Los Ángeles de San Rafael do luns 18 ao mércores 20 de abril.
A defensora branquiazul, fixa nas aliñacións do Deportivo ABANCA B, adéstrase habitualmente co primeiro equipo de Reto Iberdrola, co que chegou xa a debutar en competición oficial. Paula Novo forma parte do nutrido grupo de internacionais que militan no Dépor ABANCA, tanto no primeiro como no segundo equipo, como Ainhoa Marín, Eva Dios, Carlota Sánchez, Aroa Guerra ou Abril Pazos.
A última derrota ligueira en Lezama ante o Athletic Club B deixou ás branquiazuis cuartas con 43 puntos (os mesmos que SE AEM); a 1 punto do FC Levante Las Planas (terceiro con 44 puntos); a 3 puntos do CDF Osasuna (segundo con 46 puntos); e a 4 puntos do RCD Espanyol (líder agora con 47 puntos).
Así chega o Cd Pradejón para medirse ao Dépor ABANCA
Pola súa banda, o CD Pradejón é décimo cuarto (antepenúltimo) con 23 puntos, en zona de perigo. Na primeira volta disputada na localidade rioxana, o triunfo foi deportivista (0-2). O CD Pradejón preséntase na Cidade Deportiva de Abegondo despois de derrotar claramente no seu campo (3-0) ao Seagull. Lonxe do Municipal de Pradejón, esta temporada cultivou 3 vitorias, 2 empates e 6 derrotas, cun balance de 12 goles a favor e 21 en contra.
No entanto, foi capaz de derrotar en novembro a domicilio ao FC Levante Las Planas (1-2), na que foi a primeira derrota de por aquel entón líder destacado; e empatar (1-1) co DUX en Logroño o pasado 13 de marzo.
A última saída do CD Pradejón liquidouse con derrota (4-1) ante un dos equipos máis fortes no seu terreo de xogo, o SE AEM.
