Ainhoa Marín vestirá de branquiazul ata o 2025. A atacante do Dépor ABANCA renovou co club coruñés por tres tempadas máis. Así o confirmou o presidente da entidade, Antonio Couceiro, no almorzo organizado pola Asociación da Prensa da Coruña.
A futbolista é unha das pezas claves no debuxo de Miguel Llorente, que confiou nela para formar parte do once titular en todos os partidos que as deportivistas levan xogado esta tempada en Reto Iberdrola.
Protagonista en moitas das xogadas de ataque do Dépor ABANCA Ainhoa Marín leva 7 goles no que vai de curso, e recibiu a chamada da Selección sub23 para o amigable ante Noruega de novembro.
Couceiro asegurou que esta renovación é unha mostra do compromiso do club co Dépor ABANCA, ao manter no plantel a unha das mellores xogadoras da Reto Iberdrola.
Antes de recalar nas filas herculinas, Ainhoa Marín formouse na canteira culé para pasar despois polo Espanyol na Primera Iberdrola, e polo Seagull, próximo rival das deportivistas, en Reto Iberdrola.
O convenio coa Asociación de Fútbol Aficionado de A Coruña incluirá o fútbol feminino
No acto de Antonio Couceiro coa APC, o presidente confirmou que o R.C. Deportivo asinará un novo acordo coa Asociación de Fútbol Aficionado de A Coruña. A principal novidade está na inclusión dos equipos femininos, que ademais recibirán un incentivo para “fomentar a inclusión das nenas no fútbol”.
Así mesmo, eliminarase o convenio de pagos individuais que se viñan facendo cando un futbolista dos equipos da AFAC se incorporaba á canteira branquiazul. Os recursos deste convenio estarán canalizados polo Deportivo a través da súa Fundación.
