- África Sempere: “Teño moitas ganas e ilusión por seguir formando parte deste club”.
- A súa experiencia é un valor seguro tanto dentro de pista como á hora de guiar ás mozas.
Que África Sempere é unha institución no Mecalia Atlético Guardés é algo que sabe todo o mundo. Seis tempadas, un título de Liga e incontables actuacións memorables fan da pivote ilicitana unha xogadora histórica no club. Por todo iso -e por moito máis- ambas as partes seguirán engrosando a súa historia xuntos. Sempere renova co club miñoto e afrontará a súa sétima campaña xunto á desembocadura do Miño.
África Sempere será, pois, a xogadora con máis tempadas no equipo do persoal de Cristina Cabeza. Un dato que a confirma como un dos pesos pesados do vestiario. As súas calidades, consabidas por todos, se amoldan á perfección á idea de xogo da adestradora madrileña. É un pivote moi rápida, con moi bos esvaramentos e moita capacidade para correr ao contraataque. A nivel defensivo é firme e intuitiva e ofrece unha magnífica variante cando actúa no avanzado dunha defensa 5:1. Afri non falla e na súa sétima tempada no Guardés tampouco o fará.
África Sempere: “Estou segura de que faremos un equipo moi competitivo, como sempre”
África Sempere está feliz de seguir na súa casa. Por iso, aínda que xa encara a súa sétima tempada na entidade, móstrase con “moitas ganas e ilusión por seguir formando parte do club” e apunta con esperanza cara ao “novo proxecto” que o Guardés está a preparar para a próxima tempada. “Estou segura de que faremos un gran equipo, que será moi competitivo, como sempre. Oxalá podamos loitar por estar arriba e conseguir éxitos para gozar todos xuntos”, conclúe.
