A vitoria escápaselle das mans ao Maristas Coruña constantemente, deixándoo como o equipo con máis derrotas consecutivas neste momento da LF2. Algo que intentarán revertir este sábado, 13 de febreiro, ás 19:00 horas no Colexio Maristas. Nesta data teñen unha cita contra o Ausarta Barakaldo, o sétimo clasificado.
Non está tendo sorte ultimamente o conxunto dirixido por Jorge Carreira. As coruñesas non coñecen a vitoria desde hai case un mes, e nas últimas tres xornadas os partidos caeron para os rivais nos últimos minutos.
O último destes encontros perdidos foi ante o Azkoitia Azpeitia, o terceiro clasificado, e un conxunto ao que as galegas trataron de ti a ti, eliminando na pista as diferenzas da táboa. Porén, malia poñer ao rival contra as cordas, as galegas do Maristas non foron capaces de transformar a vitoria.
O Maristas trata de ti a ti, pero sen vencer, ao terceiro clasificado (70-65)
Co reñido da competición, especialmente na parte baixa da táboa, cada trunfo é vital e un mal momento deportivo como o das coruñesas pode determinar o futuro do equipo na Liga Feminina 2. A falta de sete xornadas por disputar, máis os partidos adiados, a diferenza entre o sétimo e o colista é de nove puntos, seis co penúltimo clasificado.
Liderando esta segunda metade da táboa está ao Barakaldo. Un conxunto que leva no seu haber nove vitorias e 10 derrotas, cun saldo de 28 puntos. Con todo, os dous últimos partidos, ante Ardoi e BAXI Ferrol, dous dos contrincantes máis duros da categoría, deixa ás vascas cunha das peores rachas da LF2.
O Maristas foi de máis a menos na ida
Xa na ida este enfrontamento foi moi relevante para as herculinas. Antes do partido, as de Carreira ocupaban a sexta posición. Tras perder na pista de Vizcaia, pasaron á novena.
Naquel partido de mediados de novembro, o Maristas comezou con confianza, pero enseguida fíxose pequeno. As galegas leváronse o primeiro cuarto, pero a partir do segundo o Barakaldo colleu o mando.
