Desde o CSD abórdase a posibilidade de que o deporte federado non profesional poida superar os límites do toque de queda nos desprazamentos esixidos pola práctica deportiva. Así o comunicou a Xunta de Galicia a través da Secretaría Xeral para o Deporte, logo dunha reunión da Plataforma Interterritorial do Grupo de Tareas de Impulso al Deporte (GTID) na que participou José Ramón Lete Lasa.
Logo desta xuntanza, o secretario xeral para o Deporte da Xunta de Galicia, insiste unha vez máis na “necesidade de esclarecer os puntos que aínda non están pechados no protocolo do CSD, nomeadamente, no caso das probas de detección a realizar e o seu financiamento”.
O secretario xeral para o Deporte, José Ramón Lete Lasa, participou onte na Plataforma Interterritorial do Grupo de Tareas de Impulso al Deporte (GTID) e as Comunidades Autónomas para a análise e posta en común do Real Decreto 926/2020, de 25 de outubro, polo que se declara o estado de alarma para conter a propagación de infeccións causadas polo SARS-CoV-2.
Segundo informa a Secretaría Xeral para o deporte “nesta reunión, o Consejo Superior de Deportes abordou a posibilidade de que o deporte federado non profesional poida ser asimilado ao deporte profesional no punto H do artigo 5º e no punto K do artigo 6º do devandito Real Decreto nos que se exceptúan os casos das limitacións de liberdade de circulación das persoas en horario nocturno e de entrada e saída nas comunidades autónomas”.
Explican desde a Xunta que deste xeito, “o deporte federado non profesional podería contar con permiso de mobilidade e superar as franxas horarias establecidas -de 23:00 a 6:00 horas- nos desprazamentos esixidos pola propia práctica deportiva”.
A cuestión dos tests
Ademais, o secretario xeral para o Deporte insistiu unha vez máis na “necesidade de esclarecer os puntos que aínda non están pechados no protocolo para o regreso das competicións oficiais de ámbito estatal e carácter non profesional, elaborado polo CSD, nomeadamente no caso das probas de detección a realizar e o seu financiamento”.
Explican desde a Secretaría Xeral para o deporte que precisamente estas cuestións “están pendentes de decidir no Consejo Interterritorial del Sistema Nacional de Salud, a pesar de que a gran maioría das competicións xa teñen comezado”.
En Galicia, a Xunta esixe test serolóxicos nas competicións estatais
A Xunta agarda a celebración deste Consello para dirimir estas cuestións de absoluta importancia para a reactivación do deporte estatal. Lete Lasa lembrou que a Orde do 30 de setembro de 2020 da Xunta de Galicia que esixe “test serolóxicos ou outras probas similares” para os equipos e deportistas das competicións deportivas oficiais non profesionais de ámbito estatal de modalidades deportivas que poidan implicar contacto é unha medida “provisional” para “cubrir transitoriamente un baleiro que é necesario abordar sen moita máis dilación”.
