Adriana Martín é o nome da ‘verduga’ do Dépor ABANCA nesta xornada. Neste primero partido do ano 2022 para As Nosas deportivistas, gañaron as branquiazuis e gañou o RCD, pero non foi o RC Deportivo ABANCA que neste arranque de xaneiro locía a camiseta negra con faixa branca e azul vertical no peito. O triundo na Cidade Deportiva Dani Jarque caeu do bando local para o casilleiro do RCD Espanyol.
As futbolistas que adestra Miguel Llorente colleitaron a súa segunda derrota da tempada, a primeira do ano. E fixérono, xustamente, nun partido no que, na previa, o técnico que as prepara tíñase amosado absolutamente convencido da valía e es posibilidades das coruñesas. “Podemos volver perdendo, pero a miña confianza no equipo é impertubable. Estamos no mellor momento da tempada e vai a ser difícil que nos quiten tres puntos, desde a humildade e consciente de que podemos perder”, decía Miguel Llorente.
Efectivamente o nivel competitivo das Nosas deportivistas estaba a ser impecable. Pero nin todos os días son festa, nin imos tirar do clásico e dicir “sentoulles mal o turrón”. Non, simplemente non se pode gañar sempre. E hoxe, na Cidade Deportiva Dani Jarque, non tocaba.
Enfronte, por moito que se falarse antes do cruce do perigo de Karpova, e por moito que a primeira chegada de perigo fose precisamente desa xogadora, o certo é que a deportista que si tivo o gol nas súas botas foi Ariana Martín. A veterana futbolista, anotou os dous goles do encontro converténdose en verduga das deportivistas.
O primeiro aviso, do Depór, o primeiro gol, do Espanyol
Nada máis empezar o partido as deportivistas pedían penalti por man na área de Xènia, unha falta que a colexiada non apreciou. Houbo un aviso das locais superados os cinco minutos de xogo que non pasou diso. Foi cun centro raso de Daniela Caracas desde a dereita. O centro da colombiana chegou ás botas de Nadezhda Karpova que rematou alto.
Primeiro cuarto de hora no #RCDEspanyolDéporABANCA!
🦋 #VoemosXuntas 💙 #MoitoPorVivir pic.twitter.com/2xnqbJ4stl
— RC Deportivo (@RCDeportivo) January 8, 2022
O primeiro tanto chegou no minuto doce. Adriana Martín aproveitaba un rexeite de Ana Vallés logo dun disparo da rusa. Así, case soa, e con demasiado espazo na área para pensar e e rematar, a perica remataba superando á cancerbeira do Dépor ABANCA, Ana Valles (1-0). Así, con tantos, festexaba a futbolista a súa volta ao conxunto barcelonés logo de pasar pola Lazio.
A partir de aí o encontro tomou un rumbo que en nada favorecía ás galegas. Unha forte presión das locais non deixaba pensar con claridade a un Dépor ABANCA que non sacaba o seu fútbol. Pasarían moitos minutos antes de que, mediada a primeira parte, as futbolistas que adestra Miguel Llorente volvesen a facerse co control do partido. Chegaron aí as ocasións de María Ruiz e Paula Gutiérrez. E tamén o tiro ao longueiro de Ale Serrano. Pero ninguna destas xogadas se materializaron en gol.
O equipo que adestra Rubén Casado soubo frear o xogo deportivista cunha férrea defensa e as faltas que foron precisas. O fútbol tamén é iso. Non deixar xogar nin pensar ao rival. O resultado foi que non se viu sobre o tepe da Cidade Deportiva Dani Jarque ao Dépor ABANCA que estamos afeitas a ver. Faltou conducción, e sobre todo xogo asociativo. E cando un equipo non ten na cancha ben visible o seu ADN deportivo, corre o risco de non recoñecerse e esvaecerse.
Miguel Llorente move o banco deportivista buscando a reacción
Logo do descanso, máis do mesmo. A cousa non mellorou. Tanto foi así que Miguel Llorente moveu o banco. Entraron Eva Dios e Aroa Guerra en substitución de Ale Serrano e Laura Fernández.
Nada mudaba no guión do partido. Outra vez Adriana Martín levaba perigo á meta defendida por Ana Valles. Foi cun tiro lonxano que saliu polo lateral, o mesmo que a vaselina que lanzou dez minutos máis tarde e que se foi alta. Todos estos achegamentos da ex da Lazio eran avisos do que logo viría.
Un cuarto de hora para o asubío final do #RCDEspanyolDéporABANCA!
🦋 #VoemosXuntas 💙 #MoitoPorVivir pic.twitter.com/T3m9J3N76i
— RC Deportivo (@RCDeportivo) January 8, 2022
Outro dos movementos de Miguel Llorente foi dar entrada a Goretti no campo, en substitución de Andrea Sierra. Este cambio levou a Patri López, a mudar o lateral esquerdo polo dereito. Pero nada fixo que Myllyloja pasase apuros reais na segunda metade.
O segundo gol de Adriana Martín
E chegou a puntilla a través dun contragolpe. Subiu o esférico por banda dereita Judit Pablos para servirlle a pelota en bandexa no punto de penalti a unha Adriana Martín que estaba en racha e volvía superar á gardameta do Dépor ABANCA, Ana Valles. Foi no minuto 88 e con ese 2-0 o partido quedaba sentenciado.
Esta é a segunda derrota da tempada para as coruñesas, que non empezan o ano como querían. Ata agora so perderon a domicilio, contra o DUX Logroño e neste cruce co RCD Español.
Durme líder o Dépor ABANCA esta noite, pero ollo co primeiro posto, xa que queda pendente de conservarse. Se mañá o Levante Las Planas vence ao AEM, producirísase un relevo no liderato e as coruñesas volverían ao segundo lugar da táboa na Reto Iberdrola devolvéndolle o lugar ao Levante Las Planas a quen lle arrebaba o lugar no último partido de 2021.
O RCD Espanyol, con sou sen Adriana Martín, non deixa de ser un candidato ao ascenso á Liga Iberdrola, ao igual que o Dépor ABANCA, e así se demostrou nesta xornada. O ascenso e o retorno á elite, será traballado, ou non será. Queda traballo, hai madeira e ganas sobran.
Final do #RCDEspanyolDéporABANCA, 2-0!
🦋 #VoemosXuntas 💙 #MoitoPorVivir pic.twitter.com/mEUdyUaR0M
— RC Deportivo (@RCDeportivo) January 8, 2022
FICHA TÉCNICA
2) RCD ESPANYOL: Myllyoja, Caracas, Xènia, Laia, Sara (Júlia Guerra, min. 79), Carol, Nayadet Opazo, Adriana Martín, Baudet, Manu Lareo (Judit Pablos, min. 59) e Karpova (Szymanowski, min. 50).
0) RC DEPORTIVO ABANCA: Ana Valles, Andrea Sierra (Goretti, min. 65), Inés Altamira, Raquel García, Patri López, Paula Gutiérrez, Jone Ibáñez, Ainhoa Marín, Alejandra Serrano (Eva Dios, min. 55), María Ruiz e Laura Fernández (Aroa Guerra, min. 55).
GOLES: 1-0 Adriana Martín (min. 12); 2-0 Adriana Martín (min. 88).
ÁRBITRO: Andrea Salvador Sánchez , do colexio catalán). Cartón amarelo a Nayadet Opazo (min. 13), Karpova (min. 40), Paula Gutiérrez (min. 42), Ainhoa Marín (min. 67) e Caracas (min. 87).
INCIDENCIAS: Partido correspondente á 13ª xornada de liga na Reto Iberdrola disputado na Ciutat Esportiva Dani Jarque, en Sant Adrià de Besòs (Barcelona). Non faltou na grada a presenza de afeccionadas deportivistas que acudiron a animar As Nosas, a Peña Deportivista de Barcelona estivo aí unha vez máis alentando ás galegas.
