O Atlético Guardés está esquivando á COVID-19, pero non así os seus rivais. Todos os plans competitivos das galegas están sendo continuamente cambiados, con adiamentos e suspensións de partidos. Un deles foi o encontro ligueiro contra o Lanzarote Puerto del Carmen, que non se puido disputar na data orixinal e agora tampouco se fará na nova data.
O conxunto canario ten dous casos positivos en COVID-19 nas súas filas, o que imposibilita que o duelo contra o Guardés se celebre o próximo mércores, 3 de febreiro. Ambos clubs teñen ata ese día para fixar unha nova data para celebrar a oitava xornada da Liga Guerreras Iberdrola.
A detección destas persoas contaxiadas e as probas ás que se teñen que someter o resto de membros do equipo, así como a corentena que deben pasar, superan os seis días que quedaban ata a nova data acordada.
O Guardés volverá a competir na primeira fin de semana de febreiro
Este adiamento súmase ao aprazamento da segunda eliminatoria da Copa da Raíña, polo cal o Guardés non volverá á pista ata o próximo sábado, 6 de febreiro, cando visiten ao Uneatlántico Pereda en terras cántabras.
Desde o club galego envían unha mensaxe de ánimo a todos os equipos do balonmán español “que se están vendo duramente afectados nas últimas semanas por casos de coronavirus entre os seus integrantes, con todo o que isto acarrea para a saúde e o estado físico”.
Ante o incremento de casos positivos, esta semana a Real Federación Española de Balonmano, xunto con clubs do territorio español, acordaron endurecer as medidas de protección sanitarias.
A Federación Española de balonmán incrementa as medidas sanitarias pola COVID-19
