Tócalle parón forzoso ao Dépor ABANCA por mor da COVID-19. O partido entre o Zaragoza CFF e o conxunto coruñés, tivo que ser adiado ao detectarse casos de infección por coronavirus no vestiario branquiazul.
O cruce, correspondente á xornada 16ª no grupo norte de Reto Iberdrola, estaba previsto para este domingo 30 de xaneiro ás 12:00 horas en Villanueva de Gállego.
Segundo informa o RC Deportivo “agora será o Comité de Competición o que estableza unha nova data para disputarse o partido, o máis próxima posible no tempo, pero sempre no momento no que o permitan as condicións sanitarias”. O equipo branquiazul descansará toda a fin de semana, hoxe sábado e mañá domingo. As xogadoras do club branquiazul están citadas para traballar de novo sobre o tepe de Abegondo o vindeiro luns 31 de xaneiro ás 17:00 horas.
Neste momento da competición, o Dépor ABANCA é o equipo líder do grupo Norte cun total de 37 puntos na súa conta, é dicir, tres de vantaxe con respecto ao FC Levante Las Planas, que é segundo clasificado con 34 puntos. Hai que matizar que as rivais das galegas teñen un partido menos xogado.
A próxima cita para o equipo que preparan Miguel Llorente e Ana González será o domingo 6 de febreiro ás 12:00 en Abegondo diante o CDF Osasuna, en partido correspondente á 17ª xornada, tal e ocmo informa o RC Deportivo.