As futbolistas do Dépor ABANCA suman outro partido aprazado ao seu calendario competitivo. A 17ª xornada da Liga Iberdrola, prevista para o mércores, 27 de xaneiro, en Abegondo, contra o Spoting Club de Huelva, queda adiada.
As 22 xogadoras e membros do corpo técnico do cadro andaluz atópanse en corentena ao ter sido contacto estreito dunha persoa do equipo que resultou ser positiva en COVID-19. Ante esta situación, o rival do Dépor ABANCA está a cumprir as medidas sanitarias obrigatorias para frear a expansión do virus e que obrigan a un periodo de illamento.
O Dépor ABANCA ten tres partidos aprazados
Con este, as branquiazuis teñen xa tres encontros adiados. O partido ante Real Betis e a recuperación da sétima xornada co Rayo Vallecano xa tiveron que ser aprazados polo contacto das herculinas cun positivo. O primeiro xa ten nova data: será o 14 de febreiro, ás 17:00 horas, na Cidade Deportiva de Abegondo.
Para o duelo ante as andaluzas do Sporting Huelva, o club herculino declara que ambas entidades están traballando en atopar unha data o máis próxima posible para disputar o partido.
A semana pasada, as xogadoras de Manu Sánchez volveron xa ao traballo, co seguinte encontro en mente: o 24 de xaneiro, na visita ao Valencia FCF.
