Os Campionatos de España Absolutos de Aire Libre deron proba do alto nivel do atletismo galego. Na velocidade, un nome propio destacou sobre o resto. A paralímpica e campioa mundial Adi Iglesias estableceu un novo récord galego absoluto e europeo nos 100 metros, na semifinal da proba.
“Estou moi moi contenta cos resultados conseguidos. Vin competir e desfrutar coas mellores de España e ao final saiume mellor do que me esperaba”, relataba a Iglesias no seu Instagram.
Con esta cifra, a atleta do Lucus Caixa Rural Galega superou a marca galega antes mantida por Ana Peleteiro, e perfílase como unha moi seria candidata ao título paralímpico de Toquio. A maiores, Adi lograba a súa segunda mellor marca do ano nas semifinais dos 200 m. con 24.62 pero con preto de tres metros por segundo de vento en contra, o que pon de manifesto o excelente estado de forma da lucense.
Ver esta publicación en Instagram
Iglesias conseguiu ademais batir o récord de Europa nos 200 ml a nivel paralímpico, cunha marca de 24,62. Outro fito engadido a unha gran tempada da atleta do club lucense.
As outras representantes do atletismo galego
Noutros concursos, a compañeira de equipo de Adi Iglesias, Laura Santos, clasificábase para a final por tempos con 4:29.90 logrando na mesma a décima segunda posición. Nos 400 valos Lucía Ribadulla lograba a sexta posición nas semis correndondo moi ben e logrando a segunda MMT con 1:01.38. Menos sorte tivo Belén García do ADAS Proinor quen remataba oitava con 1:05.15. Mesmo posto de finalista no concurso de martelo no sexto lugar, para a internacional Irene Gómez con 54.91 m.
Nos fosos, bo campionato da venezolana con ficha galega Nediam Vargas establecendo unha MMP na loxitude con 6.01 m. Na marcha excelente comportamento de Carmen Escaríz do Ourense Atletismo, quen malia competir con problemas físicos, confirmaba a súa progresión logrando a quinta praza con 48:30.80.
No sector de combinadas traballado sétimo lugar de Eva Queimaño con 4.830 puntos e na que a súa proba forte volvían ser os 100 valos con 15.06. Por último, nas probas de relevos quinto lugar para o Ría Ferrol nos 4×400 femininos con 3:44.78.
Na competición tamén destacaron a nivel individual Leticia Gil, ouro en lonxitude, Ana Peleteiro, ouro en triplo salto, e Belén Toimil, récord do lanzamento en aire libre e ouro na mesma proba.
