Os días 17 e 18 de agosto, con gallo da celebración do VIII Campionato Nacional de Barco Dragón en Trasona, Asturias, en distancia 200 e 500 m., volveu a revolotear, e con máis forza que nunca , o equipo da ADC Bolboretas A Coruña Dragón Boat BCS.
Segundo informa a Federación Española de Piragüismo neste VIII Campionato Nacional de Barco Dragón estaba prevista a participación dun “total de 285 embarcacións” chegadas “de 12 comunidades autónomas sendo a de Andalucía a que máis barcos vai poñer na auga, cun total de 88, e onde os clubs do noso país van ser 29”.
Neste campionato estatal que chegaba á súa oitava edición, contábase coa participación dun total de 814 deportistas dos que 283 eran homes e 531 eran mulleres. Como se pode observar houbo maioría feminina entre os deportistas.
Todas e todos eles padexaron en barcos DB 12 200 metros (Open, Muller e Mixto) e DB 22 200 metros (Open e Mixto) e en DB 12 500 metros (Open, Muller e Mixto).
Ver esta publicación en Instagram
Resultados das Bolboretas no estatal
No caso das padexeiras galegas da ADC Bolboretas A Coruña Dragón Boat BCS tras a súa participación en diferentes categorías, as deportistas herculinas volven a terras e augas coruñesas cheas de ilusión, coas súas mochilas cargadas de boas sensacións e moitas ganas de continuar adiante.
Deportivamente as Bolboretas da Coruña conseguiron mellorar todos os seus tempos e cumprir os seus obxectivos nas categorías principais para elas, sendo medalla de prata na categoría PD3 de 500 m, 4.º posto en PD3 200 m, 5.º posto en categoría BCS de 500 m. e logrando clasificarse, cunha remontada sensacional, para a final de BCS de 200 m.
Pioneiras en Galicia na modalidade do barco Dragón
A Asociación Deportiva e Cultural Bolboretas A Coruña Dragón Boat BCS, primeira en Galicia na modalidade de barco dragón, está composta integramente por pacientes que padecen ou padeceron cancro de mama.
Explican desde a ADC Bolboretas A Coruña Dragón Boat BCS que “o exercicio físico, é un piar fundamental para elas e no paleo no barco dragón atoparon unha forma marabillosa de mellorar as secuelas dunha enfermidade, coa que, por desgraza, moitas persoas teñen e terán que lidar, pero, ademais, e moito máis importante se cabe, atoparon, un equipo de xente fantástica coa compartir e gozar, mellorando as súas secuelas físicas e psicolóxicas, tanto nas súas saídas ao mar como en todas e cada unha das actividades nas que participan”.
Segundo informan desde Asociación Deportiva e Cultural Bolboretas A Coruña Dragón Boat BCS “dedican os seus logros, como non, cunha mirada e un sorriso enorme ao ceo, a todas aquelas bolboretas que xa que non están entre nós, pero que, acompáñanas sempre dándolles forza en cada palada, ás súas nenas; Aldara, Clara, Noa e Sofía fillas de socias que se soben a bordo para gozar con elas e dirixilas a golpe de tambor e movemento certeiro do temón e ao seu adestrador Rodrigo Navarro polas súas ensinazas, polos seus sabios consellos, a súa paciencia infinita, a súa simpatía e polo mellor dos agasallos, o seu tempo”.
A Asociación Deportiva e Cultural Bolboretas A Coruña Dragon Boat BCS é una asociación sen ánimo de lucro formada por persoas que teñen padecido ou están a padecer cancro de mama. Non hai límite de idade. As persoas integrantes practican o remo na modalidade de Dragón Boat coa intención de mellorar a súa calidade de vida física, emocional e social.
Unha traiñeira de orixe chinesa
O barco Dragón Boat é unha traiñeira de orixe chinesa moi estable que se manexa padexando ao xeito das canoas.
Desde a Asociación Deportiva e Cultural Bolboretas A Coruña Dragon Boat BCS explican que promocionan o deporte “para manter un estilo de vida saudable”. Aseguran gozar do “exercicio en contacto coa natureza”.
“Esta actividade tamén é un xeito de visibilizar o cancro de mama”, sosteñen.
O motivo polo que se elixiu o remo é debido a que, segundo explican desde a Asociación Deportiva e Cultural Bolboretas A Coruña Dragon Boat BCS é que:
- Aporta os beneficios xerais do exercicio físico.
- Hai estudos (dun médico canadiano chamado Don McKenzie) que apuntan a que pode sumar á hora de previr e mellorar algunha das secuela do cancro de mama.
- Pódese practicar sen límite de idade.
- No caso das persoas con cancro de mama, permite o salto cualitativo de pasar de doentes a deportistas.
Aseguran tamén dese a Asociación Deportiva e Cultural Bolboretas A Coruña Dragon Boat BCS que esta actividade “fornece a musculatura do tronco superior, axuda a recuperar actividades cotiás e gozosas, pero tamén a autoestima, ao adestrar ao aire libre incrementa a sensación de desconexión e liberdade”.
Salientan igualmente desde a Asociación Deportiva e Cultural Bolboretas A Coruña Dragon Boat BCS que como deporte en equipo esta modalidade de barco Dragón Boat “suma en valores como o compromiso, a solidariedade ou o compañeirismo”. O espírito de cooperación e superación acompaña a estas bolboretas padexeiras que fan deporte xuntas nun Barco Dragón polos mares e rías galegas.
Se logo de ler esta información queres poñerte en contacto coa Asociación Deportiva e Cultural Bolboretas A Coruña Dragon Boat BCS podes escribir a bolboretascoruna@gmail.com ou chamar ao teléfono 643 46 10 17. Nesta peza informativa atoparedes ligazóns ás súas redes e á súa web.
_________________________________________________________
Deixamos neste espazo a reportaxe que o equipo de As Nosas elaboraba no ano 2021 sobre este proxecto que se mantén en activo e vai acadando metas deportivas e sociais. Unha inciativa que ten evolucionado moito neste tempo como se pode apreciar la lectura desta reportaxe de hai tres anos.
