A Maratón Atlántica Coruña42 é, en si mesma, un acontecemento deportivo de grande reclamo, pero esta edición, ademais, está rodea da dunha chea de actividades que fan a cita aínda máis interesante non so para as persoas que afronten este reto deportivo concreto, senon tamén para moitas outras afeccionadas ao deporte e máis en concreto ao atletismo.
Este domingo, 2 de outubro, regresa o Maratón Atlántico Coruña42, na que será a novena edición desta cita, e reaparecendo, despois da pandemia, tras un importante esforzo organizativo.
O maratón, que partirá da avenida de Montouto e presentará tres tramos diferenciados, porá a proba a resistencia das e dos deportistas con 42.195 metros polas rúas da cidade, onde tamén se desenvolverá, en paralelo, unha 10K. Ademais, recupérase a chegada a María Pita desde Rego de Auga, que só se rexistrou, con moi boa aceptación por parte das e dos atletas, na edición de 2015.
Este martes, a concelleira de Deportes do Concello da Coruña, Mónica Martínez, subliñou que “o obxectivo do goberno municipal é situar á Coruña42 entre as mellores probas deportivas de España e convertela nun patrimonio máis da cidade”. Neste sentido, e para reforzar a programación complementaria ao maratón deste fin de semana, Martínez presentou as actividades deportivas complementarias que se levarán a cabo entre venres e sábado na Coruña.
O plan de actividades deportivas complementarias á Coruña42 será o seguinte:
Regresa a Exporunning, a Feira do Corredor, logo de sete anos de ausencia
Exporunning celebrarase entre o venres, 30 de setembro (de 17.00 a 21.30 horas), e o sábado 1 de outubro (de 10.00 a 20.00 horas), no Palexco, coa atleta Julia Vaquero como madriña desta edición. Neste evento, que non se celebraba desde hai sete anos, as persoas inscritas na C42 e a 10K poderán recoller os seus dorsais e descubrir as últimas novidades sobre a práctica do atletismo.
Ademais, este sábado habilitaranse espazos para coñecer as últimas tendencias en nutrición e materiais deportivos, así como relatorios multidisciplinares relacionados co deporte, a psicoloxía e fisioterapia. Os horarios previstos son os seguintes:
- 17.00 a 17.30 horas: Saúl Sánchez, nutricionista.
- 17.30 a 18.00 horas: Madó González, psicóloga deportiva.
- 18.00 a 18.30 horas: Rodrigo Gavela, campión de España de maratón, sobre o adestramento.
- 18.30 a 19.00 horas: Mesa redonda con Saúl Sánchez, Madó González, Rodrigo Gavela e os atletas Andrés Díaz e Julia Vaquero.
Brekfast Run Solidario unha proba non competiva con Julia Vaquero e Andrés Díaz
Esta proba, non competitiva, comezará o sábado ás 9.30 horas, no paseo do Parrote. Será o punto de saída e tamén de chegada dun percorrido solidario que pasará polo Paseo Marítimo e a Torre de Hércules, con Julia Vaquero como guía para os participantes en trote lixeiro e o atleta coruñés Andrés Díaz como ‘lebre’ para participantes en carreira máis suave.
“O custo simbólico da inscrición e de un euro para os participantes rexistrados na C42 e de dous euros para o resto de corredores, importe que será destinado, integramente, á Asociación de Daño Cerebral de Coruña (Adaceco)”, concretou Mónica Martínez, a concelleira de Deportes do Concello da Coruña, que estivo acompañada, na presentación destas actividades, por Juan Luis Delgado e Natalia de Llano, presidente e directora de Adaceco, respectivamente.
A inscrición no Breakfast Run Solidario pode levarse a cabo, de forma presencial, na sede de Adaceco, así como o venres e sábado na Feira do Corredor, Exporunning. Tamén o sábado, no posto que estará habilitado a esta fin no paseo do Parrote. Tamén é posible inscribirse por vía telemática, ata este xoves 29 (23.59 horas).
Pasta Party en Palexco para as persoas que corran a Coruña42
Este sábado tamén terá lugar a Pasta Party, unha cita promovida pola organización da Coruña42 e que ofrecerá, ás persoas participantes, tres quendas de comida con diferentes tipos de pasta a elixir como prato principal, con vistas á carreira.
A Pasta Party, que terá lugar no Palexco, comezará ás 13.00 horas, coa segunda e a terceira quenda ás 14.00 e 15.00 horas, respectivamente. Haberá un límite de 100 prazas para cada unha das tandas. O prazo de inscrición, aberto a través da web de ChampionChip Norte, estará dispoñible ata este mércores, 28 de setembro.
A asistencia ao evento terá un custo de 9 a 2 euros en función da idade e a asistencia, ou non, á C42. Por outra banda, será gratuíto para as nenos e nenos menores de catro anos.
A Mini C42, unha proba orientada a menores de idade
Tamén o sábado, desde as 11.15 horas e co paseo do Parrote como epicentro da actividade, terán lugar as probas da Mini C42, a versión da C42 orientada a menores de idade e aberta ata en seis categorías (sub-18, sub-16, sub-14, sub-12, sub-10 e peques).
A inscrición, gratuíta e as persoas participantes terán que confirmar, no momento de anotarse no evento, o nome do centro escolar ao que pertencen.
Coruña42 volve e faino cun novo circuíto e un atractivo final
Regresa á Coruña Exporunning da man da Maratón Atlántica Coruña42
