Na tarde do pasado mércores 19 de agosto presentouse, no Teatro Alfonsetti de Betanzos, un acordo de colaboración entre o Troula Betanzos FS e o Viaxes Amarelle FSF que se inicia a próxima tempada. Con este pacto búscase fomentar o crecemento do fútbol sala feminino na comarca de Coruña e Betanzos, así como poder aumentar o tráfico de xogadoras en idades de base na localidade betanceira. Ao mesmo tempo, o conxunto herculino dotará de recursos para tratar de facer isto posible e chegar a un crecemento equilibrado do fútbol sala feminino.
O Troula Betanzos FS é un club fundado no ano 1995 que, con seriedade e humildade, foi crecendo pouco a pouco nas competicións e en estrutura deportiva, chegando a competir na Primeira Nacional B entre os anos 2002 e 2009. A parte do primeiro equipo, sempre se caracterizou por ter unha extensa estrutura en categorías inferiores. Nos últimos anos, o club betanceiro optou por sacar unha sección feminina na que viñeron traballando e á agora tentan dar un impulso definitivo para poder asentala no club.
https://twitter.com/TroulaFemenino/status/1296738369410674688?s=20
Pola súa banda, o Viaxes Amarelle FSF é un club fundado no ano 1997 que, con traballo e seriedade, foi medrando e focalizando os esforzos nos equipos femininos ata ser un referente a nivel local, provincial, autonómico e mesmo nacional. Un conxunto que vai camiño de iniciar a súa quinta tempada na Primeira División Nacional Feminina FS.
https://twitter.com/amarellefsf/status/1296555192977170432?s=20
Pero á parte da competición de primeiro nivel, que o club foi referente nos últimos anos, xa que sempre apostou pola base. Agora mesmo é un referente na cidade herculina en canto a traballo de calidade coas categorías inferiores, contando para a próxima tempada cun equipo benjamín, un equipo alevín, dous infantís e un equipo cadete, dos cales, alevíns, infantís e cadetes van competir en competicións de ámbito autonómico.
O acordo permitirá a conxunto betanceiro crecer e consolidarse
Dentro do acordo asinado por ambos os clubs, o principal punto e polo que se traballará de forma conxunta é para dar cobertura ao Troula Betanzos FS na captación de nenas da propia localidade e a súa comarca, para poder así dotar ao equipo dunha base sólida en categorías femininas. Para conseguir lograr tal punto, o conxunto laranxa dotará dos recursos necesarios ao equipo de Betanzos, á vez que se realizarán charlas conxuntas en diferentes colexios do concello e arredores.
Xogadoras e corpo técnico das herculinas participarán en adestramentos puntuais do Troula, ao mesmo tempo que queda aberta a porta a que algunhas xogadoras do Amarelle pasen a realizar labores de monitoras de fútbol sala na base do equipo betanceiro. Tamén a que varias xogadoras do conxunto de Betanzos poidan realizar a pretemporada co equipo de Primeira División Nacional Feminina FS.
Coa intención de dotar de repercusión e facer crecer o fútbol sala feminino, ambas as entidades comprométense a traballar de forma conxunta para a realización de diferentes eventos, tales como poden ser torneos, campus, charlas, accións formativa. Desde ambas institucións esperan que sexa un inicio a un proxecto a longo prazo, que xere sinerxias e faga crecer o fútbol sala feminino nas comarcas de Coruña e Betanzos nos próximos anos.
