As concellerías de Deportes e Educación do Concello da Coruña poñen en marcha un programa de entrevistas coa finalidade de que as e os estudantes da cidade poidan afondar nas experiencias das e dos deportistas olímpicos da coruñeses desde un punto de vista máis humano e próximo. Artellarase en forma de entrevistas que conducirá a xornalista herculina Lis Franco.
A concelleira de Deportes, Mónica Martínez, e o edil de Educación, Jesús Celemín, acompañados do atleta herculino Andrés Díaz, presentaron o ciclo “Coruña Olímpica. Achegando o soño ás nosas e nosos estudantes”, que o Concello herculino pon en marcha. A iniciativa está dirixida a escolares de 3.º, 4.º, 5.º e 6.º de Educación Primaria de centros educativos públicos e concertados da cidade coruñesa.
O ciclo consiste nunha serie de entrevistas a través das cales se dará a coñecer a experiencia deportiva, pero sobre todo a persoal dalgunha destas persoas deportistas coruñesas. Para acadar un maior dinamismo e interese, a entrevista, realizada pola xornalista Lis Franco, verase salpicada polas preguntas que o propio alumnado lle poida facer ás persoas protagonistas.
O concelleiro de Educación sinalou que a finalidade desta iniciativa é “coñecer máis de preto o traballo, a disciplina, a mentalidade e a forma de ver a vida das e dos deportistas”. Para Celemín tratase dunha iniciativa nova que lle permitirá ao alumnado descubrir o percorrido das e dos deportistas até chegar á elite.
Coruñeses á procura de praza en Toquio
Pola súa banda, a concelleira de Deportes, Mónica Martínez, lembrou que “a pandemia roubounos os Xogos 2020, pero non o talento das e dos deportistas coruñeses que participaron ao longo da historia dos Xogos” e que para Tokio buscan praza Alberto Seoane (tenis de mesa adaptado), Jacobo Garrido (natación), Julia Benedetti (skateboard), Víctor Castro (halterofilia), Enmanuel Reyes (boxeo) e Alberto Gaitero (judo).
Canto a Andrés Díaz, o atleta cualificou a iniciativa coma “unha ferramenta moi importante para fomentar o deporte e educar en valores olímpicos e deportivos”. Considera que a mellor maneira de comunicar é a través do exemplo e todas e todos os deportistas que participarán nas charlas “foron educadas/os na cultura do esforzo, o compañeirismo a superación, o respecto, o compromiso”.
Andrés Díaz, atleta olímpico coruñés: “unha ferramenta moi importante para fomentar o deporte e educar en valores olímpicos e deportivos”
Por iso, confía en que “poidamos influír a través das nosas experiencias cara á práctica do deporte e unha educación en valores” . Gustaríalle que as nenas e os nenos entendesen o lema olímpico non só como a busca dun resultado, senón como un exemplo de superación constante e de mellora que se pode trasladar á vida académica e persoal. “Sería estupendo que despois das charlas algunha nena o neno tivese o soño que tivemos nós de ser olímpicos/as”, dixo.
Os sete deportistas olímpicos protagonistas
Para este ciclo de entrevistas o Concello da Coruña vai contar coa participación das seguintes persoas deportistas olímpicas coruñesas aínda que o listado final está suxeito a algún cambio pola axenda das/os participantes:
- Andrés Díaz (atletismo) 6 de maio
- Roberto Naveira (judo) 22 de abril
- Pucho Boedo (judo adaptado) 13 de maio
- Indalecio Iglesias (tenis de mesa adaptado) 28 de abril
- Victorino González (judo) 15 de abril
- Sofía Toro (vela) 8 de abril
- Paula Medín (rugby) 20 de maio
O ciclo comeza o vindeiro 8 de abril e terá lugar todos os xoves de abril e maio en horario de mañá, cunha duración dunha hora.
