A última xornada da Primera División Femenina de voleibol viña cun derbi galego entre o Calasancias Coruña e o Aceites Abril CVO, dous equipos cunha traxectoria similar e que mediron forzas no terreo coruñés. O resultado final, que tivo que resolverse na morte súbita, foi favorable ás ourensás, que suman dous puntos. O resultado foi 2-3 para o Voleyourense con tanteos de 25-23, 16-25, 25-27, 27-25 e 8-15.
Esta segunda volta foi moi diferente á primeira. No partido de ida, o Aceites Abril venceu con comodidade cun contundente 3-0, pero desta vez as herculinas non ían deixar escapar o partido tan facilmente.
Se na primeira volta competitiva o Calasancias non foi quen de asinar ningún set, nesta nova edición do derbi forzaron o tie break. Nos últmos meses o equipo coruñés medrou nas pistas e foi quen de disputar o encontro dunha forma moi ordeada e con carácter loitador.
No lado contrario da rede, o Aceites Abril aguantaba dignamente o pulso e sobresaía grazas á súa maior experiencia logrando lixeiras vantaxes no marcador, pero nunca suficientes para afianzar o partido.
As locais presionaban con dureza e poñían ás ourensás contra as cordas, complicándolles o trunfo. A tónica do duelo foi de constante igualdade, e só no segundo set puido percibirse un dominio visitante.
A partir da terceira manga, ambos conxuntos deron mostra do gran nivel do voleibol galego cun espectáculo na pista. Os intercambios de puntos facían que o resultado seguise aberto a que calquer cadro se proclamase campión.
No cuarto set este vaivén de puntuación, cos dous equipos adiantándose mutuamente sen descanso, resultou nun empate que forzaría o tie break para decidir ao gañador.
O Aceites Abril rompeu o partido no tie break
Neste quinto set, as xogadoras do Aceites Abril sacaron a relucir a súa eficacia desde o saque, que lles permitiu abrir unha fenda no marcador, e acadar unha vantaxe que manterían ata o final do duelo.
Estes dous puntos da vitoria deixan ás ourensás na terceira posición da táboa, a dez puntos do líder e dous do segundo clasificado. No caso das coruñesas, o Calasancias ocupa a sétima posición, con 10 puntos, a sete das colistas e 12 das terceiras.
