O conxunto ourensá do Aceites Abril recibe ao Universidad de Valladolid esta xornada. Neste partido loitará por manter a cuarta posición na que actualmente se atopa na táboa clasificatoria. O cruce está marcado para as 11:30 horas de mañá, domingo 21 de febreiro de 2021, no pavillón do Pompeo de Ourense.
Despois da pasada xornada, na cal a plantilla do Aceites Abril se desprazaba a Salamanca conseguindo sumar tres valiosos puntos, chega agora unha xornada na que o equipo ourensán xa traballa para solucionar os principais erros do partido da ida fronte ao Universidad de Valladolid que levaba o gato á auga naquel cruce por un claro 3-0. Na mente das galegas está o claro obxectivo de volver sumar una vitoria e afianzarse na zona nobre da clasificación.
O equipo valisoletano ocupa a quinta posición a catro puntos das ourensás e con dous partidos menos sen disputar. E sto fai que o duelo sexa de vital importancia para os intereses de ambos os conxuntos xa que a estas alturas xa non hai marxe de erro para a maioría dos equipos en competición.
As xogadoras do Aceites Abril CVO esperan facer valer a súa condición de conxunto local para así aproveitar o factor cancha. O encontro disputarase no Pompeo que xa está considerado un auténtico fortín do equipo ourensán.
Durante o encontro se gardará un minuto de silencio en memoria de David Gómez vítima de recente accidente de tráfico e membro da familia do Club Voleibol Ourense.
O encontro será a porta pechada debido ás restricións vixentes en Galicia para conter a propagación do virus da COVID-19. Así e todo, as persoas afeccionadas do Aceites Abril CVO que así o desexen poderán
gozar do choque en directo a través da transmisión que se levará a cabo nas redes sociais do @voleyourense.
A canteira do Aceites Abril CV Ourense volve á actividade
As categorías inferiores do Aceites Abril Club Voleibol Ourense volverá ás canchas despois da pausa obrigada polas autoridades.
Esta semana o goberno autonómico reabría a posibilidade de competir no ámbito autonomico federado. Era o presidente da Xunta de Galicia, Alberto Núñez Feijóo, o que facía o anuncio. Así, os diferentes equipos do Club Voleibol Ourense comezarán esta mesma semana a prepararse para o regreso á competición que está prevista para o vindeiro 6 de marzo de 2021.
