A penúltima xornada da Primeira División viu cunha de cal e outra de area para as xogadoras galegas. O Aceites Abril CVO logrou, tras vencer por un 3-1 ao CV Oviedo, ter un posto no play-off de ascenso, mentres que o Calasancias Coruña e o CV Bruxas perderon os seus partidos.
As herculinas xogaron contra o CD Voleibol Astillero, un rival directo e co que tiveron un partido rifado, un 2-3 final en contra das galegas. Pola súa banda, o Bruxas competía co Curtidora Universidad de Oviedo, o terceiro clasificado, e caeu por un pleno de sets para as asturianas.
O Aceites Abril, único rival que gañou ao CV Oviedo
As primeiras, as ourensás, estiveron de celebración esta fin de semana. O conxunto do Aceites Abril recibía en casa a o rival máis duro do seu grupo, o CV Oviedo, que ata o momento levaba un pleno de 16 vitorias. Unha vitoria das locais, como finalmente se produxo, garantía a segunda posición para as galegas e un posto no play off polo ascenso a Superliga Feminina 2.
As líderes chegaban a O Pompeo dispostas a demostrar porque son o mellor equipo do grupo, e así o fixeron no primeiro set, no que lograron impoñerse ás locais. Porén, esta sería a última manga que se adxudicarían, xa que as ourensás reaccionaron no segundo tempo.
Sobrepoñendose á tensión e nervios propios dun partido tan relevante, o Aceites Abril foi capaz de recortar distancias e ser cada vez máis efectivas, dominando xa o xogo en casa. As visitantes non baixaban os brazos, pero as locais eran xa superiores, asignándose o segundo set.
A tónica mantívose na terceira e cuarta manga, cun xogo coral que permitiu que as ourensás deran a sorpresa e roubáranlle puntos ao invicto CV Oviedo. Con tres puntos máis no casilleiro, o Aceites Abril competirá a fase de ascenso entre o 23 e o 25 de abril.
Derrota en casa do Calasancias
Tamén o domingo 21, o Calasancias Coruña disputou o seu encontro da 21ª xornada. Este enfrontaba ás herculinas co CD Voleibol Astillero, un rival cunha traxectoria similar esta tempada.
Antes do partido, dous puntos e unha posición separaban a ambos equipos, tendo as galegas un partido menos disputado. Cun 2-3 final, a distancia redúcese a un punto, quedando aínda por debaixo o Astillero.
Como prometía a clasificación, este foi un duelo rifado entre ambos equipos, que queren evitar as última prazas da táboa coa tempada a piques de rematar. Xa o primeiro set, cun 23-25, deixou ver que a tónica sería a igualdade do encontro, pero para a segunda manga as locais tomaron o control e realizaron un 25-13.
No terceiro set, as visitantes reaccionaron de novo, levándose pola mínima o punto, cun 23-25. As coruñesas do Calasancias responderon no seguinte tempo dándolle a volta ao marcador, poñendo de novo as táboas. O partido tivo que decidirse no tie break, que resultou a favor do Astillero cun 12-15.
O Bruxas non pode co terceiro clasificado
E un día antes, o sábado 20, o Bruxas visitaba ás terceiras clasificadas, o Curtidora Universidad de Oviedo. Un rival superior, que así o demostrou sobre a pista, onde non deu opción ás galegas.
As de Ames viaxaron a terras asturianas coa esperanza de dar a sorpresa e sumar puntos para crecer na táboa, onde están ancoradas á sexta posición. Porén, o conxunto local quere manter as opcións de disputar a fase de ascenso, polo que non cedeu en ningún momento.
A primeira manga marcou a dinámica do encontro, cun Oviedo controlador, que sumaba o primeiro punto cun 25-16. O guion foi similar no segundo set, cun Bruxas algo máis acertado en ataque, pero aínda por debaixo das locais (25-18). O partido setenciouse no terceiro tempo, cun conxunto galego cada vez mellor, pero que non foi quen de forzar un cuarto set (25-20).
