A cancha do Pompeo tiña todo preparado para un novo duelo, nunha xornada de especial importancia para o voleibol da cidade de Ourense, xa que o partido enfrontaba a dous rival é directos polo segundo posto da clasificación. Dunha banda o Aceites Abril CVO e da outra o Fertiberia Los Campos. O triunfo foi para as locais por 3-0 e tanteos de 25-18, 25-13, 25-12.
O inicio do encontro estivo marcado por unha serie de erros no saque por parte do equipo local, esta situación duraría moi pouco, o persoal ourensán empezaría a demostrar que sabían o que se xogaban e n ou deron opción ao equipo asturiano.
O Aceites Abril despregaba un xogo imparable para as visitantes en todas as facetas do xogo e conseguía sumar un punto tras outro sen darlle ningunha opción de reacción ás visitantes. O primeiro dos sets foi para as galegas por un tanteo de 25-18. O segundo e o terceiro, aínda os gañarían con maior solvencia: 25-13 e 25-12 respectivamente.
Durante o tres sets que durou o partido as xogadoras do equipo de Ourense demostraron o nivel de xogo ao que son capaces de chegar. Punto tras punto, ratificaron que lle porán as cousas moi difíciles a calquera rival e máis se é no fortín ourensá do Pompeo onde o plantel do Voleyourense faise cada vez máis, e máis grande.
Con este resultado, o equipo ourensán aférrase un pouco máis á segunda posición coa mente posta o derbi galego da semana que vén que lles enfronta aos CV Bruxas e co claro obxectivo de sumar tres novos puntos que as achegarían a xogar a fase de ascenso á Superliga 2 do Voleibol Nacional.
Ao término da xornada o Aceites Abril Club Voleibol Ourense ocupa a segunda posición na Primeira División Feminina do Voleibol estatal, mentres que as súas rivais do Fertiberia AD Los Campos son quintas clasificadas.
Derrota do CV Bruxas 3-0 e do Calasancias Coruña 2-3
As xogadoras do Club Voleibol Bruxas non puideron dar a sorpresa na cancha das líderes, o Club Voleibol Oviedo. As asturianas vencían por un claro 3-0 e tanteos nos sets de 25-9, 25-13 e 25-18. Non deron opcións ás galegas.
Derrota tamén no caso do Calasancias Coruña, pero neste caso xogando como local e recibindo ao Universidad de Salamanca un rival directo que se lles achega ás herculinas na táboa. O partido, disputado en terras coruñesas, estivo tan disputado que se chegou ao quinto set. A derrota das galegas foi por 2-3.
O primeiro set sería para as locais que vencían con claridade 25-17, pero no segundo xa chegou a igualdade e o primeiro set para as salmantinas que vencían 23-25. Se lle damos a volta, 25-23, temos o resultado do terceiro set que tamén foi moi disputado e que puña o partido 2-1 para as locais.
O cuarto non foi menos loitado por ambas escuadras que sabían ben o que se decidía e levaron o set até o 21-25. O quinto e definitivo rematou cun 11-15 para o Universidad de Salamanca. Logo desta 19ª xornada de liga na Primeira División Feminina do Voleibol estatal, o Calasancias Coruña é sétimo e as salmantinas son oitavas so un punto por debaixo das galegas.
A próxima xornada ten duelo galego
O vindeiro sábado 13 de marzo toca duelo de rivalidade rexional galega no Pavillón Municipal de Bertamiráns. Alí, o CV Bruxas recibirá ao Aceites Abril Club Voleibol Ourense. O encontro está fixado para as 19:30 horas.
Pola súa parte, as coruñesas do Calasancias visitan, tamén o sábado 13 pero ás 16:30, ao Universidad de Valladolid no Pavillón Fuente de la Mora.
O domingo 14 ás 12:30 horas está fixada a visita do Club Voleibol Bruxas ao Polideportivo Miguel de Unamuno para medirse ao Universidad de Salamanca.
