- As entidades deportivas do Concello de Lugo poderán presentar as súas peticións para o uso de balde de instalacións municipais, vía telemática e por rexistro, á Concellería de Xuventude e Deportes, ata o vindeiro 30 de maio
O Concello de Lugo abriu hoxe, día 15 de maio, o prazo para presentar as solicitudes de utilización gratuíta das instalacións municipais a todos os clubs e asociacións deportivas federadas, de cara á tempada 2025-2026. Así o deu a coñecer o concelleiro de Xuventude e Deportes, Jorge Bustos, quen sinalou que “un ano máis o Concello de Lugo porá a disposición destas entidades as máis de 30 instalacións deportivas con que conta o municipio para a súa utilización gratuíta, nunha clara aposta pola promoción do deporte de base e das categorías inferiores”.
Os clubs e asociacións deportivas federadas de Lugo interesadas en facer estas peticións, poderán realizala ata o vindeiro día 30 de maio, vía telemática, e por Rexistro Xeral á Concellería de Xuventude e Deporte. Para iso haberá que cubrir o modelo 801, dispoñible na web do Concello de Lugo, nesta ligazón.
Trinta instalacións que usan preto de 100 clubs de Lugo
Jorge Bustos lembra que “as máis de 30 instalacións das que dispón o Concello de Lugo son esenciais para garantir o labor dos clubs e das asociacións municipais e o seu traballo coa canteira, de aí que o seu mantemento e conservación sexa unha das nosas prioridades. Mantelas en condicións adecuadas para os adestramentos e torneos supón un orzamento de case dous millóns de euros anuais, dentro do Plan Dinámico de Intervencións” que desenvolve o Executivo Local.
Gracias a estas actuacións, segundo explica o edil de Deportes, “na actualidade uns cen clubs empregan as instalacións municipais, co que ademais se contribúe a inculcar hábitos saudables e favorecer o deporte base”.
