A posición de porteira está gañando cada vez máis relevancia no ámbito do fútbol sala. É por iso que a Escola Galega de Adestradores lanza este ano un curso especializado no adestramento de gardametas.
O obxectivo é proporcionar formación sobre unha posición única e profesionalizada. A través deste curso, apoiado pola Real Federación Galega de Fútbol, as persoas asistentes obterán un diploma para poder exercer como adestradora ou adestrador de gardametas en equipos de fútbol sala.
Curso semipresencial e coordinado por Mon Barreiro e Adri Paz
Esta é a primeira edición do curso, que realizarase de maneira semipresencial con parte teóricas dunhas 20 horas a través dun campus virtual e dous sábados de prácticas presenciais en Santiago de Compostela ocupando outras 20 horas. As 20 horas restantes serán para realizar tarefas e traballos en clubs. En total, admitiranse ata 28 estudantes.
Á fronte del estarán Mon Barreiro e Adri Paz, dous profesionais con experiencia na materia. Como requisito, solicítase estar en posesión do Diploma Federativo de Adestrador/a de Fútbol Sala Nacional C (Monitor/a de Fútbol Sala). Aínda que tamén poderán acceder as persoas aspirantes que posúan o Diploma Federativo de Adestrador/a de Fútbol Sala Nivel 1 (Básico), Nivel 2 (Avanzado) ou Nivel 3 (Profesional).
Esta formación poderá compaxinarse coa realización do Curso Federativo de Adestrador/a de Fútbol Sala Nacional C, pero non poderá obterse o Diploma de especialista en adestramento de porteiras/os sen ter obtido o Diploma e Credencial Nacional C.
O prazo de inscrición estará aberto ata o 27de novembro e pode realizarse a través desta ligazón. As persoas interesadas que xa teñan as claves poden realizar a inscrición a través da Intranet.
O resto de información da convocatoria pode consultarse nesta ligazón.
