O Concello da Coruña abriu este mércores 6 de marzo o prazo para solicitar as bolsas individuais destinadas ás e aos deportistas coruñeses, unha medida impulsada co obxectivo de facilitar o desenvolvemento dos seus adestramentos e competicións, contribuíndo economicamente para sufragar gastos coma os desprazamentos, licenzas federativas e equipamentos.
A presente convocatoria establece que poderán ser beneficiarias as persoas de nacionalidade española que sexan deportistas federados, exclusivamente na modalidade de deporte individual, e que cumpran requisitos diversos. Entre eles, ter unha idade mínima de 10 anos e máxima de 40 anos cumpridos na data do último día do prazo de presentación da solicitude en cuestión.
A este respecto, cómpre lembrar que tamén será preciso que a persoa esté empadroada no termo municipal por un prazo mínimo de dous anos, consecutivos ou non, dentro dos cinco anos anteriores ao exercicio no que se realice a solicitude. Tamén se valorarán aspectos como o arraigamento persoal e profesional para coa cidade. É dicir, que o solicitante nacese na Coruña, vivir ou adestrar regularmente no termo municipal, ou estar matriculado nun centro oficial de estudos na cidade.
“Apostamos por apoiar e promocionar o deporte da nosa cidade. En primeiro lugar, para facilitar o desenvolvemento do talento deportivo coruñés desde idades temperás e, ademais, para abrir camiño á participación das e dos deportistas en competicións que tamén supoñan éxitos para a cidade”, apuntou hoxe o concelleiro de Deportes, Manuel Vázquez.
A Coruña destina 120.000€ a estas axudas
Con esta finalidade, o Concello da Coruña destinará un total de 120.000 euros para sufragar as bolsas para deportistas individuais. No procedemento de solicitudes terase en conta, por exemplo, a participación en competicións como os vindeiros Xogos Olímpicos, Xogos Paralímpicos, Campionatos do Mundo, Campionatos de Europa, Campionatos de España e Campionatos Autonómicos. Desta forma, o importe global distribuirase, sempre que as solicitudes presentadas o permitan, con límites específicos para cada categoría.
Neste sentido, nos pregos da convocatoria estipúlase que o prazo de execución das actividades susceptibles de apoio económico a través deste programa municipal deberán desenvolverse no período comprendido entre o pasado 1 de xaneiro e o 31 de decembro deste ano.
Prazo para pedir as bolsas
As e os deportistas federados que cumpran os requisitos establecidos e estean interesados en solicitar as bolsas en cuestión xa poden presentar a súa solicitude desde hoxe, a través da sede electrónica do Concello da Coruña nun prazo de 20 días naturais a contar desde este mércores 6 de marzo.
A información completa pode consultarse no extracto xa publicado no Boletín Oficial da Provincia (BOP), así como na ficha das Bolsas para deportistas individuais – Ano 2024 , habilitada na web do Concello.
