O pasado martes puidemos gozar de dúas referencias a nivel mundial do fútbol sala (Jesús Velasco e Jorge Braz) e as xornadas online no paran na RFGF. A próxima, co fútbol como protagonista, este venres a partir das 19.30 horas. O técnico do Eibar, Mendilibar e o do Espanyol, Abelardo, serán os próximos protagonistas nas quintas xornadas online que organiza a Real Federación Galega de Fútbol.
O Comité Galego de Adestradores e o Departamento de Comunicación da RFGF volven á carga. Tras o éxito destas catro primeiras xornadas a institución galega repetirá o formato e organiza este venres 10 de abril outra xornada online centrada desta vez no fútbol na que participarán José Luis Mendilibar, adestrador da SD Eibar, e Abelardo Fernández, técnico do RCD Espanyol de Barcelona. A xornada arrincará en directo na canle de Youtube da Federación Galega de Fútbol a partir das 19.30 horas.
De Terceira a Primeira
O “Pitu” Abelardo chegou ao RCD Espanyol de Barcelona o pasado mes de decembro. O míster asturiano coñece ben a cidade tras a súa longa estancia de oito anos como xogador do Barça, de 1994 a 2002, aínda que a súa primeira toma de contacto foi como olímpico nos Xogos de 1992 e aquela inesquecible medalla de ouro coa selección. Dous anos despois, o Barça pagou a súa cláusula de rescisión ao Sporting.
Tras oito anos (dúas Ligas, dúas Copas e unha Recopa) xogou unha tempada máis no Deportivo Alavés, o equipo no que tamén brillou recentemente como adestrador. Chegou a Vitoria en decembro de 2017 para tentar lograr unha salvación que logrou para situar despois ao cadro vitoriano nunha cómoda metade da táboa, tras unha primeira volta entre os mellores, con varias xornadas no liderado.
Outro dos grandes méritos de Abelardo como adestrador foi ascender a Primeira co Sporting forxado con futbolistas moi novos da canteira de Mareo e mantelos despois en Primeira División co orzamento máis curto da Liga.
Pitu empezou cos cadetes do Sporting, pero aos poucos meses despois, en 2008, xa estaba no filial. Fóra do Sporting, Abelardo propúxose empezar desde abaixo, polo que asinou polo Candás, de Terceira. Tamén estivo no Tuilla, tamén en Terceira, pero con aspiracións de ascender.
Tan silencioso como contundente
Falar nos últimos anos do SD Eibar é falar do equipo de José Luis Mendilibar. E é que o técnico vasco converteuse nun dos que máis tempo leva na Liga nun mesmo banco, concretamente desde xullo de 2015. Un gran adestrador tan silencioso como contudente.
O míster vasco, nacido en 1961 en Zaldíbar, despregou a súa carreira deportiva sobre o céspede en equipos de Segunda, nunca na elite. Aínda que curiosamente a súa traxectoria nos bancos está a ser ligado máis a clubs de Primeira que da categoría de prata. Athletic, Real Valladolid, Osasuna e Levante, ademais do citado Eibar, en dúas ocasións, foron desde 2005 os destinos do míster vasco.
Con esa mestura de esixencia e proximidade, Mendilibar labrou un éxito tan silencioso como contundente. Como mostra, o seu actual Eibar. Antes ascendeu ao Valladolid coa mellor puntuación da historia de Segunda, deixou a Osasuna a un punto da Europa League e estivo a unha vitoria de ascender co Eibar hai 14 anos.
O actual adestrador do Eibar tamén impulsou e foi clave nas carreiras de grandes xogadores como David Silva, Pedro León e Raúl García.
💥
Queredes máis? Pois este venres hai máis
🗣️ José Luis Mendilibar (@SDEibar) e o "Pitu" Abelardo (@RCDEspanyol) serán os protagonistas das V Xornadas ONLINE que organiza a RFGF
📅 VENRES 10 de abril
⏰ 19.30 horas
📺 En DIRECTO en Youtube
🔗 https://t.co/RVWTSkPiQV pic.twitter.com/4SaOf5Zo6h
— RFGF (Na Casa 🏠) (@futgal) April 7, 2020
En directo na canle de Youtube da RFGF
A xornada online “Falemos de Fútbol con José Luis Mendilibar e Abelardo Fernández” comezará ás 19.30 horas e será retransmitida en directo na canle oficial de Youtube da Real Federación Galega de Fútbol (Canle da RFGF).
