Satisfeito tras o punto de inflexión que supuxeron as tres vitorias da semana pasada, Abel González, adestrador asturiano do Mecalia Atlético Guardés pide máis. “Sabemos cal é a liña de traballo a seguir para continuar gañando partidos. Estamos con moitas ganas, queremos seguir e aproveitar esta serie de resultados que levamos”, sostén o técnico.
Abel González ve ás súas xogadoras “moi concienciadas” tras os triunfos en Málaga e diante o H71 Hoyvík por partida dobre na EHF European Cup de balonmán feminino.
“Haberá que pelexar moito para sacar puntos”, di Abel González
Con esa forza inicia o equipo miñoto a segunda volta da esperanza. “Temos oito partidos de once na Sangriña nesta segunda volta. Nese sentido, o calendario é bastante favorable, pero non vai haber partidos fáciles. Haberá que pelexar moito para sacar os puntos. Ninguén tira a toalla e todos os equipos van loitar ata o final”, advirte o adestrador de San Juan de la Arena.
O primeiro paso desta metade de tempada será no Palau D’Esports de Granollers diante un colectivo que “sempre é perigoso” e que, “ademais, sempre fai bos partidos contra o Guardés” tanto en casa como a domicilio., di Abel González. “Espero un encontro competido. O equipo que estea máis tranquilo e saiba controlar o ritmo do partido será o que leve os puntos”, conclúe o adestrador do conxunto galego.
O Guardés arrinca en Granollers a segunda volta con moita esperanza e confiando no calendario
