Xogando na casa o Dépor ABANCA ten un plus. Abegondo confírmase como o fortín das coruñesas que colleitaron 19 dos 21 puntos que estiveron en xogo no seu feudo. A última vítima das herculinas foi o Córdoba CF Femenino que caía derrotado por 3-1.
Abegondo é sinónimo de fortaleza para o Dépor ABANCA que fai do seu campo un elemento máis do xogo. Seis triunfos de sete disputados nesta cancha. Boa parte dos 24 puntos colleitados ata o momento polas coruñesas son consecuencia da súa gran imaxe en cancha propia.
O Córdoba CF Femenino complicoulle un chico o guión ao Dépor ABANCA nos primeiros minutos de xogo. As galegas tiñan o control do esférico pero non xeraban perigo. E sen chegar a porta, xa se sabe que a posesión, por si mesma, non da froitos en forma de goles.
Houbo que agardar ata case vinte minutos de xogo para contabilizar a primeira ocasión clara das xogadoras que adestra Irene Ferreras. Foi un tiro de Eva Dios desde 25 metros. O disparo acabou nas mans da porteira do Córdoba CF Femenino.
Non habería que agardar moito para que o balón parado desnivelase o marcador en Abegondo. Inés Altamira anotaba de penalti no minuto 21 (1-0). Adiantábase así o Depor ABANCA. A pena máxima pitouse por mor dunha man de Elisa na área.
Desde ese momento o control e posesión deportivistas empezaron a dar froitos en forma de ocasións. Tivo que traballar e ben Carmen Gordillo, a porteira cordobesa.
O segundo tanto chegaría no minuto 28. Inés Altamira, autora do primeiro gol, sacaba velozmente un fóra de xogo pitado na área deportivista enviando a pelota a Paula Gutiérrez, esta meteu o esférico en profundidade cara á dereita para que a velocidade de Ainhoa Marín fixera a súa maxia. Así foi, a deportivista chegaba á área e batía a Gordillo (2-0)
O Dépor ABANCA finiquitaba o partido na primeira metade anotando o terceiro tanto no minuto 37. Desta volta foi a goleadora Carlota Suárez quen confirmou o seu olfato goleador nas últimas xornadas cun novo tanto para as branquiazuis. Carlota Suárez marcaba de cabeza superando ás zagueiras andaluzas e a porteira. O centro foi de Charle (3-0).
Descanso do #DéporABANCACCFFem en #Abegondo! En quince minutos continúa o partido en directo en 📺 https://t.co/BRgppwOSdO! pic.twitter.com/JQ8LkEtuSF
— RC Deportivo (@RCDeportivo) December 10, 2022
Tivo as súas ocasións, poucas pero tívoas, o Córdoba CF Femenino. Pero Yohana estivo moi atenta e non deu pé a que o balón entrase na súa meta.
Na segunda parte, non houbo máis goles locais, pero o Dépor ABANCA seguiu dominando e acosando a portaría rival. Nada máis iniciarse o segundo acto mandou dous balóns á madeira. As autoras dos disparos foron Charle e Carlota Suárez. Carmen Gordillo impediu que a lista de goles locais aumentase facénsose forte baixo paus.
O Córdoba CF Femenino foi quen de recurtar distancias no marcador electrónico de Abegondo no minuto 71. Foi a través do saque dun libre directo bombeado desde 30 metros por parte de Elisa. O disparo, certero, superou a estirada da gardameta branquiazul Yohana que, esta vez, nada puido facer para evitar o 3-1.
O Dépor ABANCA lidera, provisionalmente ao ter un partido máis, a clasificación da Primera Federación FutFem da RFEF con 24 puntos, un máis ca o CDF Osasuna Femenino e dous máis ca SD Eibar. Ambos os dous equipos xogan como locais. No caso do Osasuna recibe ao CD Alba Fundación Femenino, e o Eibar ao Granada CF SAD. Hoxe o Dépor ABANCA, durme no cumio da táboa, mañá, xa se verá.
Fiiiiinaaaaal do #DéporABANCACCFFem, 3-1! pic.twitter.com/lT7BV9SC9l
— RC Deportivo (@RCDeportivo) December 10, 2022
FICHA TÉCNICA
3) RC DEPORTIVO ABANCA: Yohana, Cris Martínez, Inés Altamira, Raquel García, Patri López (Carlota Sánchez, min. 84), Henar (Letti, min. 59), Paula Gutiérrez, Ainhoa Marín (Millene, min. 59), Eva Dios (Monteagudo, min. 73), Charle e Carlota Suárez.
1) CÓRDOBA CF FEMENINO: Carmen Gordillo, Esojo (Sheyla Andino, min. 56), Andrea Palacios (Adriana, min. 82), Moreira, Yanire Ruiz, Noe (María Lara, min. 82), Ocón (Rodri, min. 70), Cintia Hormigo, Elisa, Maral (Lorena Guillén, min. 70) e María Barquero.
GOLES: 1-0 Inés Altamira (min. 21, de penalti); 2-0 Ainhoa Marín (min. 28); 3-0 Carlota Suárez (min. 37); 3-1 Elisa (min. 71).
EQUIPO ARBITRAL: Melissa López Osorio (colexio estremeño). Expulsou con vermella directa a María Morilla (min. 79), xogadora suplente do Córdoba CF Feminino, e por dobre cartón amarelo a Yanire Ruiz (min. 89). Ademais foron amonestadas con cartón amarelo as xogadoras: Andrea Palacios (min. 18), Letti (min. 69) e Yanire Ruiz (min. 89).
INCIDENCIAS: Partido correspondente á 12ª xornada da Primera Federación FutFem RFEF disputado na Cidade Deportiva de Abegondo.
