A xogadora galega Tamara Abalde e a súa compañeira na Selección Española de baloncesto Alba Torrens xa están recuperadas da COVID-19 e superaron os recoñecementos médicos con éxito. Ambas baloncestistas retomarán as sesións de traballo co combinado estatal para preparar a competición dos Xogos Olímpicos de Toquio.
As dúas españolas deron positivo nos controis mediante PCR establecidos por protocolo da FIBA e a FEB, tan só unha semana antes do inicio do EuroBasket. Por este motivo, tanto a galega como a valenciana perdéronse a competición europea. Porén, agora poderán reincoporarse aos adestramentos da Selección, coa vista xa posta na cidade nipona.
Abalde foi inspeccionada no Hospital Quironsalud de Pontevedra, co servizo médico oficial da Federación Española de Baloncesto, realizando un recoñecemento médico completo.
Desde a FEB sinalan como o doutor Juan Francisco Abellán enfatiza a importancia de facer un exame en profundidade, xa que “en deportistas que deron positivo en COVID-19, é importante avaliar a función respiratoria e cardiocirculatoria posteriormente para garantir unha volta á actividade física intensa sen risco de complicacións. Tras o estudo realizado, as dúas xogadoras atópanse en disposición de comezar a traballar de novo para recuperar a forma física tras estes días de reposo obrigado”.
