O presidente do Executivo galego participou na gala de entrega dos Premios Deporte Galego 2019-2022 que se celebrou en Ribeira. Alfonso Rueda enxalzou o alto nivel que acadou o deporte galego nos últimos anos e destacou o papel da Xunta á hora de apoiar e fomentar o seu desenvolvemento.
O titular do Goberno galego, acompañado do vicepresidente segundo e conselleiro de Presidencia, Xustiza e Deportes, Diego Calvo, a conselleira de Política Social e Xuventude, Fabiola García, e o secretario xeral para o Deporte, José Ramón Lete Lasa, participou en Ribeira nunha nova edición da gala dos Premios Deporte Galego. Logo dun alto de tres anos pola chegada da pandemia, retomouse a celebración dunha cerimonia na que se premiaron as figuras e entidades do deporte galego máis destacadas desde o 2019 ata o 2022.
O presidente gabou o esforzo, a dedicación e o compromiso constantes tanto dos deportistas como das institucións a pesar das restricións nas actividades pola presenza da covid-19. Un traballo, precisou, que situou o deporte galego como único de toda España que nunca se detivo.
Neste sentido, amosou a disposición da Xunta para seguir acompañando e fomentando o éxito do tecido deportivo de man tanto de competidores como de clubs, federacións e outras administracións.
Un total de 22 premiados en 18 categorías nos Premios Deporte Galego 2019-22
Esta edición dos Premios Deporte Galego resultou con 22 deportistas e entidades premiadas en 18 categorías distintas.
Teresa Portela e Ana Peleteiro foron premiadas como as mellores deportistas femininas; Adiaratou Iglesias, como a mellor deportista feminina con discapacidade; Carlos Arévalo, como mellor deportista masculino; Martín de la Puente, como mellor deportista masculino con discapacidade e Antía Jácome, como a mellor deportista revelación.
Pola súa banda, Burela FS recibiu o galardón ao mellor equipo feminino; o Cidade de Lugo Fluvial, o de mellor equipo masculino; o RC Deportivo de La Coruña Genuine e o CD Lugo Genuine, os de mellores equipos de deportistas con discapacidade e o Club Básquet Coruña resultou como a mellor entidade na promoción do deporte base.
Tamén se premiou a Miguel Martínez como mellor adestrador; a Manuel Franco como mellor xuíz; ao programa Galicia en Xogo Olímpico como mellor labor informativo; os Mundiais de Loita de Pontevedra 2022 e O Gran Camiño 2022 como mellores eventos deportivos; a Recalvi como mellor patrocinio deportivo e ao Bueu Atlético e ao Calvo Xiria co premio Xogo Limpo.
Finalmente, como entidades destacadas no fomento e promoción da actividade física e hábitos de vida activa recibiron o premio Galicia Saudable: o Inibic Sergas, como entidade de carácter público; a Fundación Abrente Equipo Enki, como entidade de carácter privado; e, por último, o IES Manuel García Barros como entidade educativa.
Lista de persoas e entidades galardoadas nos Premios Deporte Galego 2019-2022:
- Mellor deportista feminina (ex aequo): María Teresa Portela Rivas (piragüismo) e Ana Peleteiro Brión (atletismo)
- Mellor deportista feminina con discapacidade: Adiaratou Iglesias Forneiro (atletismo)
- Mellor deportista masculino: Carlos Arévalo López (piragüismo)
- Mellor deportista masculino con discapacidade: Martín de la Puente Riobó (tenis en cadeira de rodas)
- Mellor equipo feminino: Club Deportivo Burela Fútbol Sala (fútbol sala)
- Mellor equipo masculino: Club Tríatlon Cidade de Lugo Fluvial (tríatlon)
- Mellor equipo de deportistas con discapacidade (ex aequo): Real Club Deportivo de la Coruña Genuine e Club Deportivo Lugo Genuine (fútbol)
- Mellor entidade na promoción do deporte de base: Club Básquet Coruña (baloncesto)
- Mellor adestrador ou adestradora: Miguel Martínez Méndez (baloncesto)
- Mellor árbitro/a ou xuíz/a: Manuel Franco Ojea (tenis)
- Mellor labor informativo: Galicia en Xogo Olímpico (Radio Galega)
- Mellor evento deportivo (ex aequo): Mundiais de Loita sub-23 e grappling de Pontevedra 2019 e O Gran Camiño Cycling 2022
- Mellor patrocinio deportivo: Recalvi
- Mellor deportista revelación: Antía Jácome Couto (piragüismo)
- Premio ao xogo limpo (ex aequo): Escolas de Balonmán Xiria e Bueu Atlético Balonmán (balonmán)
- Premio Galicia Saudable á entidade de carácter público destacada no fomento e promoción da actividade física e hábitos de vida activa: Instituto de Investigación Biomédica da Coruña – INIBIC Sergas
- Premio Galicia Saudable á entidade de carácter privado destacada no fomento e promoción da actividade física e hábitos de vida activa: Fundación Abrente – Enki
- Premio Galicia Saudable á entidade educativa destacada no fomento e promoción da actividade física e hábitos de vida activa: IES Manuel García Barros.
