A Xunta de Galicia, a través da Secretaría Xeral para o Deporte, e o Concello de Valga, acordaron destinar unha partida de 79.525,68 euros para subvencionar as obras de pintado da estrutura metálica do pavillón de Beiro (Cordeiro).
A instalación municipal é un referente en canto a volume de utilización por parte da veciñanza. Nela practícanse deportes como patinaxe, fútbol sala, tenis, e outras actividades vencelladas ao ximnasio.
Os dirixentes das dúas administracións, o secretario José Ramón Lete Lasa e o alcalde José María Bello Maneiro, citáronse este mércores no Salón de Plenos da Casa do Concello, onde asinaron o convenio de colaboración. No acto estiveron tamén presentes os concelleiros Carmen Gómez, Malena Isorna e Pedro Calvo.
O organismo da Xunta encargarase de financiar case o 82% do custo, aportando 65.000,08 euros, mentres que o Concello de Valga aportará o restante (14.525,60 euros).
O secretario xeral asegurou a importancia deste tipo de actuacións para a dinamización da actividade deportiva en concellos como o de Valga, que conta cunha poboación de preto de 6.000 persoas.
Neste sentido, destacou que a Xunta leva anos realizando unha forte aposta por mellorar e renovar as instalacións deportivas galegas para que a cidadanía galega poida practicar actividade física nas mellores condicións.
Na súa visita ao pavillón de Beiro, os mandatarios analizaron a posibilidade de acometer outras actuacións de mellora no pavillón para favorecer a práctica deportiva por parte da poboación, especialmente a máis moza.
A Xunta destinará 9,15 millóns a obras relacionadas con infraestruturas deportivas
En total, dos 32.474.216 euros cos que conta a Secretaría Xeral para o Deporte en 2021 (un 28,5% máis que en 2020), 9,15 millóns serán destinados a obras de creación e reforma de infraestrutura deportiva, un 118% máis que en 2020 cando se destinou ao mesmo obxecto 4,2 millóns de euros.
