O secretario xeral para o Deporte, José Ramón Lete Lasa, compareceu hoxe hoxe no Parlamento de Galicia para responder a unha pregunta sobre a elaboración dun plan da redución da obesidade e do sobrepeso a través do deporte en Galicia.
O mandatario galego asegurou que a obesidade é “unha pandemia silenciosa” que xa afecta ao 60% dos adultos en Europa segundo a OMS e destacou a actuación da Xunta en múltiples direccións. Neste sentido, lembrou a aprobación no Parlamento galego en setembro de 2022 do Plan Obesidade Zero en Galicia, “único plan integral existente no Estado contra a obesidade no noso país” e que conta co obxectivo de reducir o sobrepeso nun 15% da poboación galega no 2030, o que significaría que 189.000 persoas deixen de ter sobrepeso ou obesidade.
O Plan, dixo, naceu do consenso, a consulta e a participación dos distintos sectores sociais e está avalado por once sociedades científicas polo que debe ser “o marco no que hai que traballar e sobre o que se poderán facer achegas para a consecución dos seus obxectivos”.
Promoción da saúde e prevención da obesidade
Ademais, dixo Lete Lasa, o Goberno galego, no marco desta estratexia integral de promoción da saúde e prevención da obesidade, “ten implementado un conxunto de actuacións para fomentar a actividade física regular e combater o sedentarismo, entendendo que o movemento é un dereito de saúde e unha ferramenta clave para a prevención das enfermidades crónicas non transmisibles”.
Así destacou actuacións no ámbito educativo como o programa DAFIS, que ten realizado preto de 68.000 avaliacións da condición física dos escolares galegos e galegas; no ámbito laboral como unha estratexia piloto de promoción da actividade física no lugar de traballo; o proxecto ‘Adestra a túa saúde’ a través do que o Goberno autonómico impulsa a prescrición de actividade física como intervención sanitaria preventiva; así como outras ferramentas tecnolóxicas, accións de sensibilización e comunicación social ou capacitación profesional.
Necesidade da regulación das profesións do deporte
No que atinxe á regulación da prestación de servizos deportivos Lete Lasa salientou a importancia “dos profesionais do deporte na garantía da saúde da poboación e da protección de usuarios no marco dunha actividade física e deportiva segura”, polo que solicitou ao Estado, unha vez máis, o cumprimento das súas competencias.
Segundo a Lei 39/2022, de 30 de decembro, do Deporte, o Goberno estatal debe redactar “un proxecto de lei que regule o exercicio das profesións do deporte, establecendo os dereitos e obrigacións dos profesionais e os requisitos para o desenvolvemento daquelas”.
O secretario xeral para o Deporte pechou a súa intervención informando dos datos de actividade deportiva cos que conta Galicia que incrementan ano tras ano como é o caso dos máis cativos. Dentro do Programa Xogade, que xunta toda a actividade lúdica e deportiva, escolar e federada, para os nenos e nenas de entre 6 e 16 anos, están inscritos preto de 150.000 rapaces e rapazas, o que representa o 60% dos escolares entre esas idades.
Ademais, Galicia pechou 2024 con preto de 320.000 licenzas federativas, o 11,1% da poboación galega, tres puntos por riba do 8,7% do conxunto estado, indican desde a Xunta de Galicia.
