A Xunta de Galicia destinará ata 300.000 euros en axudas ás deportistas que acudirán aos Xogos Olímpicos e Paralímpicos de Toquio, dentro do programa de subvencións Axudas Reto Galicia-Tokyo con Igualdade 2021.
O secretario xeral para o Deporte, José Ramón Lete Lasa, comentou este xoves, nunha entrevista coa Televisión de Galicia, as opcións dos distintos galegos e galegas para os Xogos ao fío da última praza acadada en Verducido pola padexeria Antía Jácome no C1 200 metros.
O secretario de Deporte de Galicia asegurou que as olímpicas galegas poden superar a vintena xa que, no momento actual, suman un total de 18 clasificadas mentres que os paralímpicos acadan a cifra das 11, polo que o número de deportistas de Galicia que acuda aos Xogos superará, probablemente, a trintena.
Todas elas, tanto olímpicas como paralímpicas, serán as beneficiarias das Axudas Reto Galicia-Tokyo con Igualdade 2021, publicadas nesta mesma mañá no Diario Oficial de Galicia e cuxo prazo de presentación estenderase do 2 de xullo ao 30 de setembro.
A campaña do NON chegará a Toquio
Estas axudas insírense no ámbito do acordo de colaboración entre a Secretaría Xeral da Igualdade da Consellería de Emprego e Igualdade e a Secretaría Xeral para o Deporte, para desenvolver medidas previstas no Pacto de Estado contra a violencia de xénero.
O obxecivo é deseñar e transmitir contidos relacionados coa loita pola tolerancia, igualdade e non violencia no deporte e na vida, entendendo esta actuación como un medio fundamental para a educación da sociedade sen discriminación e que incumbe a todas as persoas.
Deste xeito, as deportistas galegas olímpicas e paralímpicas que compitan en Toquio participarán nas actividades de difusión así como nas actividades de promoción do deporte programadas pola Secretaría Xeral para o Deporte e a Fundación Deporte Galego. Do mesmo xeito tamén participarán no programa ‘Reto 365 pola Igualdade’ e nos seus diversos actos de promoción.
Os tipos de axudas e como solicitalas
Cómpre salientar a existencia de catro tipos de axudas:
- Axuda 1, para aqueles deportistas que teñan participado en catro ou máis edicións dos Xogos ou obtiveran medalla (10.000 euros)
- Axuda 2, para aqueles que teñan participado en tres ou menos edicións dos Xogos e non acadaran medalla (8.000 euros)
- Axuda 3, para os que non teñan participado en ningunha edición anterior dos Xogos
- Axuda Deporte Adaptado, para aqueles deportistas que compitan como apoio ou guía de deportistas paralímpicos (o 50% da axuda do deportista).
As solicitudes presentaranse preferentemente por medios electrónicos a través do formulario normalizado dispoñible na sede electrónica da Xunta de Galicia. Opcionalmente, poderanse presentar as solicitudes presencialmente en formato papel orixinal no Rexistro da Fundación Deporte Galego.
