A afección deportivista, a xogadora número 12 do Dépor ABANCA, está de noraboa xa que foi convocada para esta xornada. As futbolistas coruñesas xa poderán contar co alento das súas seareiras esta fin de semana na Cidade Deportiva de Abegondo. As Nosas deportivistas seguen os pasos que deron primeiro o RC Deportivo en Riazor e logo a fin de semana pasada o Fabril en Abegondo e poderá gozar de contar con público nas bancadas.
As xogadoras que adestra Manu Sánchez estaban desexando volver contar coas seareiras na súa cancha abegondesa e o desexo está concedido. O RC Deportivo anunciou que se “implementa un protocolo de apertura do recinto deportivo cun aforo reducido”. Así o partido da Primera Iberdrola que xogará o Dépor ABANCA na Cidade Deportiva de Abegondo o próximo sábado 31 ás 13:00 horas e que medirá as xogadoras branquiazuis co Santa Teresa estremeño, terá público.
Para acceder a este encontro, para o que hai 100 invitacións dispoñibles, hai que ser socia/o do Real Club Deportivo e ter renovado o de abonado antes do martes 27 de outubro ás 17:00 h.
Como obter unha entrada para ir ver o Dépor ABANCA?
A entidade coruñesa informa de que “todas as persoas socias que teñan interese en poder dispór dunha entrada para o partido da xornada 4: Dépor ABANCA-Santa Teresa, deberán solicitalo formalmente a través da web: http://reservas.rcdeportivo.es na que deberán introducir os seus datos: nome, apelidos, IDE de socio, 4 últimos números do DNI e correo electrónico”.
Dado o escaso número de localidades dispoñibles, o Real Club Deportivo “roga encarecidamente que unicamente soliciten invitación aqueles Socios que vaian poder acudir o sábado ao partido, para evitar que queden entradas sen utilizar”.
Control para o rastreo ante posibles positivos por COVID
Explica o RC Deportivo que este procedemento “ten tres fins: poder realizar a solicitude da invitación; en caso de adxudicación de invitación, poder notificar ao socio que ten dereito de acceso á Cidade Deportiva; e, ademais, levar un control de repartición en atención á normativa sanitaria de seguimento da COVID-19“. O rastreo activaríase en caso de detectarse un positivo por coronavirus posteriormente á disputado partido de fútbol entre galegas e estremeñas.
“A solicitude formal debe realizarse entre a publicación desta normativa e o xoves 29 de outubro ás 10:00 horas, momento no que se pechará o prazo de solicitudes de entradas para o segundo partido da Tempada do Dépor ABANCA en Abegondo. Con cada solicitude obterase un código co que poderá consultar se finalmente adxudicar a posibilidade de dispor de invitación”, relatan desda a web da entidade deportivista.
Posteriormente ao peche do prazo de solicitudes notificarase, vía correo electrónico, a aqueles que sexan adxudicatarios dunha invitación que dispoñen de entrada e o método de acceso á Cidade Deportiva. A listaxe de códigos adxudicatarios tamén se publicará na páxina web: www.rcdeportivo.es.
Asentos asignados sen posibilidade de moverse a outra localidade
Todos os asistentes deberán ocupar obrigatoriamente a fila e asento asignado para poder ter a todos os afeccionados localizados en caso de rastrexo por COVID-19.
Tamén por protocolo COVID cada asistente deberá pasar un control de temperatura, higienizar as súas mans, portar máscara en todo momento, sentar obrigatoriamente na localidade asignada no punto de control de accesos (estará identificada cun adhesivo verde de ASENTO DISPOÑIBLE) e permanecer na devandita localidade sentado até finalizar o partido (unicamente permítense desprazamentos aos baños.
Sen bar nin posibilidade de consumir alimentos
Tal e como informao RCD no recinto deportivo no terá para este partido da Primera Iberdrola “non haberá servizo de bar nin está permitido introducir e consumir alimentos ao interior da Cidade Deportiva), respectando en todo momento a distancia de seguridade de 1,5 metros nos controis de acceso e durante a permanencia no interior da instalación”.
Todas as precaucións son poucas para que afección e xogadoras deportivistas poidan reencontrarse coa tranquilidade de seguir un protocolo de prevención da COVID-19 que permite acudir máis veces ao recinto deportivo da Cidade Deportiva de Abegondo e gozar do fútbol de As Nosas branquiazuis un ano máis.
