Se na fin de semana pasada as loitadoras do CV Arenal Emevé lograron unha espectacular remontada contra o Cajasol Voley Dos Hermanas, desta vez elas foron as que perderon o partido no tie break. O rival deste mércores, e gañador do duelo (2-3), foi o CV Kiele, un dos equipos máis fortes da Liga Ibedrola de Voleibol da RFEVB.
As loitadoras soñaron co trunfo, que rozaron cos dedos, pero o seu gran partido soamente lles mereceu un punto, moi necesario para lograr o obxectivo da permanencia.
O Emevé igualou o nivel do Kiele
Comezaron fortes as lucenses en casa. As xogadoras de José Valle arrastraron as boas sensacións e as melloras que demostraron na pista nas últimas semanas e que demostran que son un equipo mellor do que di a clasificación.
Os primeiros puntos foron para as visitantes, pero o Emevé non ía deixar que as rivais escapasen facilmente no marcador. Con gran acerto nos remates e nos bloqueos defensivos, as loitadoras recortaban distancias cada vez que as manchegas puntuaban.
Lucía Prol, como de costume, tomou as rendas do equipo e liderou un parcial con seis puntos consecutivos que, por fin, situaban ás locais por riba (13-9).
Entón, o Kiele demostrou porque é un dos mellores conxuntos da máxima categoría, e en pouco tempo igualou o electrónico a 13 puntos grazas a un parcial 0-4. As visitantes seguiron presionando ata levarse o primeiro set, pero aínda quedaba moito partido por diante.
Na segunda manga o xogo volveu igualarse, as locais loitaban cada balón e cada oportunidade para sumar puntos ao seu casilleiro. Os bos parciais das de Ciudad Real tiñan resposta no xogo lucense, de maneira que o Emevé logrou colocarse tres puntos por diante.
Tempo morto para reorganizarse
O adestrador rival, Chema Rodríguez viuse obrigado a solicitar un tempo morto para reorganizar ás súas xogadoras. A charla non xudiu o efecto esperado e as galegas seguiron aumentando a distancia no marcador. Pero o Kiele, lonxe de abandoar o set, loitou polo empate e cun parcial efectivo logrou situarse a só un punto das lucenses.
A vantaxe local perigaba, polo que Valle solicitou unha pausa. Coa reanudación, as loitadoras volveron a distanciarse no marcador, pero enseguida o Kiele igualou o resultado a 19 puntos. O man a man mantiña o pulso no set, que se decidiu nos segundos finais, con tres puntos consecutivos do bando local grazas á última incorporación, a grega Athanasia Liagki.
O resultado global indicaba xa o 1-1 e ningún dos dous equipos tiña previsto reducir o nivel de intensidade. Así chegou o terceiro set, no que nin Emevé nin Kiele deixaban ao contrario adiantarse. O electrónico pasaba do 3-3, ao 5-5- e ao 8-8, conxelado sempre nun empate eterno.
Entón, as loitadoras deron un golpe na mesa, cun excelente parcial 6-1 que rompeu a manga ao seu favor, colocando o marcador no 17-11. Os tempos mortos de Chema Rodríguez non serviron para reactivar ao Kiele, que non atopaba a forma de igualar ás galegas.
Cun 2-1, as xogadoras de Valle víanse cada vez máis preto da vitoria, pero aínda non podían confiarse xa que o trunfo non estaba amarrado. No cuarto set as visitantes espertaron e asignáronse o primeiro parcial 5-9. O equilibrio de poder mudou nesta manga, de tal maneira que eran as visitantes as que se facían co control do partido.
Tardaron algo máis en reaccionar, pero as loitadoras querían evitar a toda costa chegar á morte súbita. Con tres puntos consecutivos igualaban o set a 11-11 e, de novo, a vitoria case se vía ao final do túnel. Porén, o Kiele non tardou en facer esfumar as esperanzas galegas. As lucenses gañaban dun punto case á fin do set, pero as visitantes tiñan outros planes.
Punto a punto, as de Ciudad Real foron quen de levarse a cuarta manga, cun acerto que situou o marcador no 19-25 e forzaba o tie break para decidir o duelo.
Un punto salvado tras perder no tie break‘
Como nos tempos anteriores, no último set reinou a igualdade. Ningún dos conxuntos quería deixar escapar unha vitoria vital para a consecucións dos seus obxectivos. Cada punto conta e o Emevé buscaba gañar en casa para alonxarse do descenso.
A vitoria galega estaba case lograda. O marcador informaba do 13-12 a favor das lucenses a piques da fin do partido. Pero, como fixeran as de Valle na fin de semana pasada, as visitantes arrebataron o encontro nos instantes finais. Un tanto de ataque e dous erros ofensivos do Emevé foi todo o que necesitou o Kiele para levarse os dous puntos da vitoria.
De novo, Lucía Prol foi unha das xogadoras máis destacada non só do club lucense, senón tamén do partido. Na xornada anterior foi escollida como a mellor xogadora pola RFEVB e tamén neste duelo foi vital, sendo a máxima anotadora sobre a pista, con 26 puntos ás súas costas.
As loitadoras deben corrixir os erros cara o próximo partido contra un rival directo
Os erros propios foron demasiado castigo para un equipo que está mellorando notablemente nas últimas semanas. Cos seus fallos, as galegas concedéronlle 35 puntos ás rivais, o que determinou o desenlace do partido.
Tras este encontro, o Emevé suma 11 puntos, a cinco do colista, e a 20 do terceiro clasificado, ocupando a décima posición. Para a seguinte cita repetirán como locais contra o Madrid Chamberí, un rival directo que se sitúa na undécima posición.
Ver esta publicación en Instagram
FICHA TÉCNICA
CV ARENAL EMEVÉ: Audrey Alford, Inma Lavado, Sara Urrea, Carla Jiménez, Lucía Prol, Marta Otero —sexteto inicial—. Tamén xogaron: Cassie Bujan (líbero), Carolina Camino, Liagki, Ainara Burgo, Maria Rodríguez, Sanjurjo e Inés Rivas.
KIELE SOCUÉLLAMOS: Marina Saucedo, Paola Martínez, Anna Walsh, Nazaret Florián, Renata Benedito, Karina Suligoy, Amelia Portero —sexteto inicial—. Tamén xogaron: Nerea Fuentes (líbero), Saucedo, Jovanovic e Paula Miguel.
SETS: 17-25 / 25-22 / 25-18 / 19-25 / 13-15 (2-3).
ÁRBITROS: Marco Folgar e Antonio Real.
INCIDENCIAS: Partido correspondente á 16ª xornada da Liga Iberdrola de voleibol no Pazo dos Deportes de Lugo.
